Mbrojtja e ish-krerëve të UÇK-së në Hagë: Nagavci paralajmëron funksionalizimin e grupit punues

Brenda fillimit të javës së ardhshme pritet të jetë plotësisht funksional grupi punues i angazhuar për mbrojtjen juridike të ish-drejtuesve të UÇK-së në shkallën e dytë të Apelit në Hagë. Kështu ka bërë të ditur sot shefja e Grupit Parlamentar të Lëvizjes Vetëvendosje, Arbërie Nagavci, pas përfundimit të seancës plenare të Kuvendit të Kosovës. Nagavci ka sqaruar se Lëvizja Vetëvendosje ende nuk e ka zyrtarizuar emrin e deputetit që do të përfaqësojë subjektin në këtë trupë, por ka vënë theksin te rëndësia e udhëheqjes së saj nga ministri i Jashtëm, Glauk Konjufca. “Konsiderojmë se është shumë e rëndësishme që Qeveria ka marrë vendimin për themelimin e grupit punues dhe natyrisht, deputeti i deleguar nga ne do të jetë në nivel të detyrës, por nuk e kemi vendosur aktualisht sot emrin... Besoj që më së largu kah fillimi i javës së ardhshme, ne do t’i dërgojmë propozimet tona... E shoh të rëndësishëm që të udhëhiqet nga vetë zëvendëskryeministri Glauk Konjufca, i cili e ka përvojën e duhur dhe njohuritë e nevojshme edhe vullnetin që të përmbyllim me sukses mandatin që iu është dhënë... Do të jetë një grup shumëdimensional dhe nuk kam asnjë dyshim që do të ketë një pajtueshmëri të plotë të anëtarëve të grupit punues”, u shpreh ajo.