Blerja e armëve ofensive nga Serbia alarmon Brukselin, eurodeputeti kroat jep alarmin

Eurodeputeti kroat, Davor Ivo Stier, ka ngritur alarmin mbi ambiciet ushtarake të Serbisë dhe lidhjet e saj ushtarake me Kinën dhe Rusinë, duke theksuar se rreziku kryesor nuk qëndron te riarmatimi në përgjithësi, por te sigurimi specifik i armatimeve me karakter ofensiv. Gjatë një interviste, Stier vuri inati se Parlamenti Europian ka mbajtur qëndrimin më të ashpër ndaj qeverisë në Beograd, duke i bërë thirrje Komisionit Europian që të rishikojë strategjinë e tij dhe të ndërpresë financimet, pasi praktikat e deritanishme kanë dështuar plotësisht. “Nuk shqetësohemi thjesht nga procesi i riarmatimit, por nga fakti se po sigurohen armë ofensive, siç janë raketat balistike të marra nga Kina. Pyetja që shtrohet është se për çfarë i duhen Beogradit këto kapacitete sulmuese? Këtë e kemi ngritur zyrtarisht edhe përmes një rezolute të Parlamentit Europian”, u shpreh ai. Sipas tij, udhëheqja serbe nuk po tregon asnjë shenjë përafrimi me standardet e Bashkimit Europian. Veçanërisht pas ngjarjeve të dhunshme në Banjskë, ai theksoi se eurodeputetët kanë qenë mjaft kritikë ndaj pasivitetit të institucioneve të tjera unioniste, duke kërkuar masa ndëshkimore financiare për shkak të mungesës së reformave. Stier shtoi se ndërsa Parlamenti Europian ka ndjekur një linjë të prerë ndaj sjelljes serbe, Komisioni Europian ka vazhduar të besojë te metoda që fatkeqësisht nuk kanë sjellë asnjë rezultat pozitiv deri më tani. Duke përmendur zhvillimet e fundit, ai e cilësoi si shqetësuese faktin se Beogradi vazhdon të shpërfillë thirrjet e Brukselit. Si shembull, ai përmendi notën e protestës të lëshuar nga Ministria e Jashtme e Serbisë lidhur me lirinë e medias në Kroaci, duke e quajtur atë një ndërhyrje të papranueshme në punët e brendshme të një shteti tjetër në prag të zgjedhjeve. “Kjo nuk është rruga e duhur për të ecur përpara. Serbisë duhet t’i bëhet e qartë se me këto qasje politike nuk po i afrohet aspak anëtarësimit në Bashkimin Europian”, përfundoi eurodeputeti kroat.