Reagon OVL e UÇK-së: Papranueshme keqpërdorimi i flamurit gjatë protestave në Tiranë

Organizata e Veteranëve të Luftës së Ushtrisë Çlirimtare të Kosovës ka shprehur pakënaqësinë e saj të thellë, duke dënuar çdo formë të keqpërdorimit të flamurit të UÇK-së në tubimet e fundit protestuese në kryeqytetin shqiptar. Sipas këtij institucioni, skenat e regjistruara në Tiranë përbëjnë akte të pastra vandalizmi. Përmes një deklarate zyrtare për medie, kjo organizatë ka theksuar se ky simbol historik nuk duhet të shërbejë kurrsesi si mbulesë për të arsyetuar sjellje të papranueshme. “Ky simbol përfaqëson Luftën Çlirimtare të Kosovës, dëshmorët e kombit dhe lirinë e fituar nga kjo sakrificë. Si i tillë, kurrë nuk mund të përdoret për të justifikuar, identifikuar apo fshehur veprime që dëmtojnë pronën publike apo private,” theksohet në njoftimin e tyre. Në vijim të reagimit, krerët e veteranëve u kanë bërë apel pjesëmarrësve në tubimet e Tiranës që të tregojnë kujdes dhe të mos cënojnë vlerat e larta që mbart emblema e UÇK-së. “Çdo qytetar ka të drejtën e protestës, por asnjë pakënaqësi, sado e thellë të jetë, nuk i jep të drejtë askujt ta lidhë flamurin e UÇK-së me dhunën, shkatërrimin dhe plaçkitjet. U bëjmë thirrje të gjithë organizatorëve dhe pjesëmarrësve të protestave, të ruajnë dinjitetin dhe shenjtërinë e këtij simboli,” përfundon deklarata e OVL-së së UÇK-së.