Takimet e Dejona Mihalit me zyrtaren policore: Policia e Kosovës jep sqarimin zyrtar

Lidhjet dhe paraqitjet e shpeshta në publik mes Koordinatores për Komitete në Lëvizjen Vetëvendosje, Dejona Mihali, dhe zyrtares policore Marigona Beadini kanë zgjuar herë pas here kuriozitetin dhe spekulimet në opinion. Në qendër të vëmendjes ka qenë shpesh dilema nëse Policia e Kosovës i ka siguruar zyrtares së lartë të partisë në pushtet shërbimin e mbrojtjes së afërt. Kureshtja u shtua edhe më shumë pas një takimi tjetër mes tyre, i cili u vërejt së fundmi. Bëhet fjalë pikërisht për Marigona Beadinin, e cila më parë ka drejtuar një segment të Njësisë Speciale gjatë një proteste të zhvilluar në vend, ndërsa tani është shfaqur sërish nën shoqërinë e Dejona Mihalit. Lidhur me këto paqartësi, redaksia jonë ka drejtuar pyetje zyrtare drejt Policisë së Kosovës për të kuptuar natyrën e kësaj pranie. Përmes një përgjigjeje zyrtare, institucioni i sigurisë ka konfirmuar prerazi se pjesëtarja e policisë nuk është e caktuar në detyra të mbrojtjes së afërt për zonjën Mihali. "Referuar kërkesës suaj ju informojmë se zyrtarja në fjalë nuk është e angazhuar në detyrë në mbrojtje të afërt", thuhet në nomine nga Policia e Kosovës. Kjo përgjigje hedh dritë mbi faktin se shoqërimi i vazhdueshëm mes Beadinit dhe Mihalit nuk lidhet me ndonjë protokoll zyrtar sigurie apo mbrojtje të dedikuar që zakonisht u ofrohet personaliteteve të larta shtetërore, duke lënë të kuptohet se takimet e tyre i përkasin sferës personale.