Mbështetja për personat e verbër: Qeveria premton jetë të pavarur dhe mundësi reale punësimi e arsimimi

Ministri i Ministrisë për Punë, Familje dhe Vlera të Luftës Çlirimtare, Andin Hoti, ka deklaruar se ekzekutivi ka ndërmarrë hapa konkretë për ngritjen e cilësisë së mbështetjes ekonomike, forcimin e shërbimet sociale dhe përmirësimin e kornizës ligjore për qytetarët me aftësi të kufizuara. Gjatë konferencës së përbashkët të organizuar nga Zyra për Qeverisje të Mirë në kuadër të Zyrës së Kryeministrit dhe Shoqata e të Verbërve të Kosovës, me rastin e shënimit të Javës së Njeriut me Shkop të Bardhë, Hoti vuri në dukje se ndihma financiare përbën një element kyç, mirëpo ajo nuk duhet të jetë e vetmja shtyllë e përkrahjes institucionale. “Unë besoj që mënyra se si një shtet i trajton personat me aftësi të kufizuara, tregon shumë për nivelin e barazisë, solidaritetit dhe drejtësisë për atë shoqëri. Prandaj, angazhimin tonë nuk e kemi kufizuar vetëm në mbështetjen financiare, ndërsa ajo mbetet një çështje shumë e rëndësishme për të gjithë. Ne kemi ndërmarrë hapa konkretë për të përmirësuar mbështetjen ekonomike, për të fuqizuar shërbimet sociale dhe për të avancuar kornizën ligjore që garanton të drejtat e personave me aftësi të kufizuara”, u shpreh Hoti. Ndër të tjera, ministri përmendi edhe zgjerimin e përfitimeve financiare përgjatë vitit 2024, ku hyjnë edhe kompensimet e dedikuara për kujdestarët personalë të personave të verbër, në përputhje me kategorizimet e përcaktuara ligjore. Duke shpalosur vizionin afatgjatë të qeverisë, Hoti shtoi se synimi nuk mbetet vetëm te ndihma sociale: “Por ne e kemi shumë të qartë që mbështetja financiare, sado e nevojshme që është, nuk mund të jetë kufiri i politikave të Qeverisë. Synimi ynë është që personat e verbër të kenë jo vetëm mbështetje sociale, por edhe mundësi reale për arsim, aftësim profesional, punësim dhe jetë të pavarur”. Në anën tjetër, përfaqësuesi i Shoqatës së të Verbërve të Kosovës, Bekim Krasniqi, duke shprehur mirënjohjen për angazhimin e Ministrisë së Punës, Familjes dhe Vlerave të Luftës Çlirimtare në drejtim të shërbimeve sociale, vlerësoi se ende ka nevojë për një mbështetje më të gjerë që përmbush plotësisht kërkesat e këtij komuniteti. “Ministria e Punës, Familjes dhe Vlerave të Luftës Çlirimtare ka kontribuar për përmirësimin dhe ofrimin e shërbimeve sociale, mirëpo do të kisha me thënë edhe specifike për personat e verbër, por jo në masën e mjaftueshme ku shpresojmë që në të ardhmen këto fonde do të shtohen në përmbushjen e nevojave për shërbime, për komunitet, me qëllim që këta persona të jenë sa më të integruar dhe të pavarur e po ashtu me pavarësinë e tyre, të jenë edhe kontribuues në shoqëri qoftë përmes angazhimit në punë, ne do të kemi apo në debate publike”, theksoi Krasniqi. Ndërkohë, drejtuesi i konferencës dhe përfaqësuesi i Zyrës për Qeverisje të Mirë, Habit Hajredini, bëri të ditur se gjatë harkut kohor 2024–2026 janë shtypur mbi 2.190 kopje të dokumenteve, akteve ligjore dhe politikave në alfabetin Braille, duke u siguruar qasje mbi 800 përfituesve. Hajredini sqaroi se materialet janë shpërndarë në 11 shoqata e degë rajonale të personave të verbër në mbarë vendin, si dhe në një bibliotekë, ndërsa fondi total buxhetor i investuar për këtë nismë ka kaluar shifrën e 68 mijë eurove. “Gjatë periudhës 2024 dhe 2026 janë shtypur apo publikuar mori dokumente, legjislacion dhe politika në shkrimin Braille. Do të thotë kemi mbi 2.190 kopje që janë në shtyp, ku nga ky shërbim kanë përfituar mbi 800 persona të verbër, ndërsa materialet janë shpërndarë me sukses në terren”, përfundoi ai.