Tragjedia në Klinë, 22 vite burg për vrasjen e fqinjit pas konfliktit brutal

Gjykata Themelore në Pejë ka dhënë epilogun gjyqësor për ngjarjen e rëndë në Klinë, duke e dënuar me 22 vjet burgim unik të pandehurin A.N., i cili u shpall fajtor për tri vepra penale, përfshirë vrasjen dhe vrasjen e rëndë në tentativë. Vendimi është marrë nga Departamenti i Krimeve të Rënda, trup gjykues ky i kryesuar nga Musë Povataj dhe i mbështetur nga anëtarët Veton Ademaj dhe Shaqë Curri. Sipas dosjes së gjykatës, për akuzën e vrasjes i pandehuri u dënua me 19 vjet burgim, ndërsa për vrasjen e rëndë në tentativë u caktua dënimi prej pesë vjetësh. Po ashtu, për armëmbajtje pa leje, atij iu shqiptua edhe një vit burgim, të bashkuara këto në dënimin unik prej 22 vitesh heqje lirie. Krahas kësaj, institucioni i drejtësisë ka urdhëruar sekuestrimin dhe konfiskimin e përhershëm të armëve dhe municioneve të përfshira në rast, ndërsa masa e paraburgimit për të dënuarin do të mbetet në fuqi deri në plotfuqishmërinë e vendimit, por jo më gjatë se kohëzgjatja e dënimit të shqiptuar. Ngjarja tragjike ndodhi në muajin prill të vitit 2022, ku viktima M.A. dyshohet se u privua nga jeta nga fqinji i tij, A.N. Vrasjes i kishte paraprirë një mosmarrëveshje e ashpër mes familjarëve të palëve, e cila kishte degjeneruar në dhunë fizike dhe më pas kishte marrë përmasa fatale. Në kohën kur ndodhi krimi, raportohet se një familjar i të dyshuarit po merrej në pyetje nga organet e rendit në stacionin policor, pasi ishte paraqitur si viktimë e një rrahjeje paraprake.