Hamza bën thirrje për dekretim urgjent të Ligjit për Specialen: Nevojitet strategji shtetërore dhe fonde shtesë për çlirimtarët

Kryetari i Partisë Demokratike të Kosovës, Bedri Hamza, ka bërë thirrje që Ligji për Dhomat e Specializuara të procedohet menjëherë drejt Presidencës dhe të dekretohet pa humbur kohë. Njëkohësisht, ai ka kërkuar nga institucionet e vendit që të angazhohen rreth një strategjie konkrete shtetërore për fazën e apelit, si dhe të sigurojnë fonde më të mëdha për mbrojtjen juridike të ish-krerëve të UÇK-së. Gjatë fjalës së tij në foltoren e Kuvendit të Kosovës, Hamza u shpreh se rikthimi i funksionalitetit institucional nuk nënkupton shuarjen e sfidave të mëdha me të cilat përballet shteti, duke e vlerësuar gjykimin në Hagë si një ndër çështjet më madhore që prekin themelet e shtetësisë. Ai rikujtoi se Kuvendi i ka dhënë mbështetje të fuqishme këtij procesi përmes një rezolute me 99 vota dhe miratimit të Ligjit për Dhomat e Specializuara me 88 vota, i cili sipas tij e kthen këtë institucion brenda kornizës së mandatit fillestar të përcaktuar nga Kuvendi. "Ligjin nuk e kemi bërë për t’u pëlqyer. Ligjin e kemi bërë për të garantuar drejtësi dhe pavarësi nga ndikimi i çfarëdo pale," u shpreh prerë Hamza. Ai shtoi se Kosova nuk ka hequr dorë nga sovraniteti i saj duke ia deleguar atë Dhomave të Specializuara apo ndonjë instance tjetër gjyqësore, prandaj Kuvendi gëzon të drejtën e plotë legjitime për të nxjerrë ligje në mbrojtje të vlerave dhe luftës çlirimtare. Duke komentuar reagimet rreth kësaj nisme, ai theksoi se shqetësimi i vetëm i ligjshëm duhet të jetë padrejtësitë që po ndodhin në Hagë, e jo hapat ligjorë që ndërmerr Kuvendi i Kosovës. Hamza e cilësoi si të papranueshme çdo lloj presioni politik apo diplomatik të ushtruar mbi punën e Kuvendit, institucionet e drejtësisë dhe Gjykatën Kushtetuese, duke kërkuar trajtim serioz të shqetësimeve për të drejtat e të akuzuarve, të ngritura gjithashtu nga Komiteti i Avokatëve për të Drejtat e Njeriut në Angli dhe Uells. Lidhur me procedurat, kreu i PDK-së tha se sot përmbyllet afati ligjor që Kuvendi ta përcjellë aktin te Presidentja për shpallje. "Besoj shumë se edhe Presidentja do ta dekretojë atë pa vonesa," shtoi ai, duke kërkuar nga presidentja Shiroka-Pula një angazhim të palëkundur për këtë çështje dhe bashkëpunim të ngushtë me partnerët ndërkombëtarë për të mbrojtur të drejtat e ish-pjesëtarëve të UÇK-së dhe të vërtetën historike. Hamza bëri me dije se gjatë takimit që ka pasur dy ditë më parë me kryeministrin Albin Kurti, është rënë dakord që dje të themelohet Grupi Punues për hartimin e Strategjisë Shtetërore për Mbrojtjen e UÇK-së në fazën e apelit. Megjithatë, ai vuri theksin te kalimi nga fjalët te veprat konkrete. Sipas tij, kjo strategji duhet të përmbajë përgjegjësi të qarta institucionale, afate kohore dhe rezultate të matshme, duke theksuar nevojën që mbrojtja juridike dhe ajo e së vërtetës historike në rrafshin ndërkombëtar të ecin të bashkërenduara, ndërkohë që ekipet mbrojtëse duhet ta gëzojnë lirinë e plotë për të vepruar në mënyrë të pavarur dhe profesionale. Në fund të fjalës së tij, kreu i opozitës e cilësoi si nevojë imediate rritjen e mbështetjes financiare për mbrojtjen juridike të ish-udhëheqësve të UÇK-së që po përballen me drejtësinë ndërkombëtare.