Tensionet në Tiranë, Policia e Shtetit thirrje urgjente protestuesve: Largohuni nga dhunuesit, rrezikoni deri në 7 vite burg

Pas përshkallëzimit të situatës dhe tensioneve të krijuara gjatë tubimit në kryeqytet, Policia e Shtetit ka lëshuar një tjetër apel të fortë drejtuar qytetarëve pjesëmarrës, duke u kërkuar atyre që të shkëputen menjëherë nga çdo element i dhunshëm. Në reagimin zyrtar, autoritetet kanë dënuar ashpër aktet e vandalizmit, djegien e pronave publike dhe private, si dhe sulmet e drejtpërdrejta ndaj efektivëve të rendit. Policia ka nënvizuar se çdo shkelës i ligjit do të mbajë përgjegjësi personale për veprimet e kryera. “Nisur nga përshkallëzimi i dhunës ndaj punonjësve të Policisë dhe shkatërrimi me zjarr i pronës publike dhe private, Policia e Shtetit iu bën thirrje të përsëritura dhe të forta të gjithë pjesëmarrësve në tubim, të ruajnë vetëpërmbajtjen dhe qetësinë, si dhe të distancohen menjëherë dhe në mënyrë të qartë, nga personat që kryejnë akte dhune, djegie dhe sulme ndaj punonjësve të Policisë”, thuhet në nomimin e strukturave të rendit. Më tej, nga Policia theksohet se tubimet nuk duhet të shërbejnë kurrë si mbulesë për akte kriminale dhe shkatërruese. Çdo individ që merr pjesë në akte dhune apo shkatërrim pronëzie do të përballet me drejtësinë sipas dispozitave ligjore në fuqi. “Kodi Penal parashikon dënime deri në 7 vjet burgim për vepra të caktuara që lidhen me dhunën dhe shkatërrimin e pronës me zjarr, në varësi të rrethanave dhe pasojave të shkaktuara. Veprimet e dhunshme dhe shkatërrimi i pronës me zjarr rrezikojnë drejtpërdrejt jetën e qytetarëve, si dhe pronën publike dhe private. Distancohuni menjëherë nga dhuna, largohuni nga personat që kryejnë akte të dhunshme dhe mos u përfshini në veprime që rrezikojnë jetën e njerëzve! Ruajtja e qetësisë dhe e sigurisë është përgjegjësi e gjithsecilit”, vijon deklarata. Në përmbyllje të reagimit, autoritetet për kujtojnë se ndonëse e drejta për të protestuar është e garantuar me ligj, veprimet e dhunshme dhe vandalizmi nuk mund të konsiderohen pjesë e saj, ndaj çdo shkelje do të trajtohet me vendosmëri të plotë.