Ish-sulmuesi italian bën pendesën publike: Te Real Madridi shpërdorova shansin e jetës sime

Antonio Cassano ka dhënë një rrëfim të hapur rreth periudhës së tij te Real Madridi, duke pranuar hapur se humbi një mundësi të artë për shkak të sjelljes dhe mungesës së përkushtimit profesional. Në një intervistë dhënë për të përditshmen spanjolle “AS”, në prag të ndeshjes mes Romës dhe Real Madridit, ish-reprezentuesi italian ka reflektuar mbi gabimet që karakterizuan aventurën e tij tek klubi mbretëror. Cassano u transferua te Reali në vitin 2005, por dështoi të linte gjurmët e pritura, pavarësisht dhuntisë së tij të jashtëzakonshme sportive. Ai ka theksuar se pengesa kryesore nuk ishte niveli i tij teknik, por mungesa e disiplinës dhe e dëshirës për t'u sakrifikuar. “Kam pasur shumë talent dhe pak sakrifica, këtë e di e gjithë bota. Nuk kisha vullnetin e duhur për të ngrënë më pak dhe për të punuar më shumë, por në mënyrën time kam qenë i lumtur”, u shpreh ai. I pyetur në lidhje me daljen e tij të parë para mediave gjatë prezantimit si lojtar i Realit, ish-sulmuesi pranoi se kishte marrë vendime të papërshtatshme edhe në atë aspekt. “Nuk e di çfarë më kalonte nëpër mendje 20 vite më parë. Isha budalla. Kisha veshur një xhaketë të tmerrshme dhe nuk isha veshur siç duhej për atë rast. Por ky isha unë. Bëja marrëzira dhe në Madrid edhe më shumë”, pranoi ish-futbollisti. Më tej, ai ka qenë edhe më kritik ndaj vetvetes, duke thënë se sjellja e tij meritonte ndëshkim të rëndë. “Duhej të më kishin futur në burg, sepse sjellja ime ishte e tmerrshme. Më pëlqente të haja, të dilja dhe të mos stërvitesha. Isha dhjetë kilogramë mbi peshë. I gjithë faji ishte imi”, theksoi Cassano. Në kujtimet e tij, ai veçoi Ronaldon, Zinedine Zidane dhe Gutin si lojtarët më të zotë me të cilët ka ndarë fushën, duke pranuar se në atë kohë interesohej për gjithçka tjetër përveç futbollit të luajtur. “Cassano i asaj kohe, me mendësinë që kam sot, do të kishte luajtur dhjetë vite në atë skuadër, sepse cilësitë i kishte. Gjithsesi, ishte një krenari e jashtëzakonshme të luaja në Madrid. Reali është klubi më i madh në historinë e futbollit”, përfundoi italiani.