Skandali financiar trondit FIFA-n: Gianni Infantino në qendër të akuzave për pagesa të padeklaruara

Shtëpia e futbollit botëror, FIFA, ndodhet sërish në syrin e stuhisë pas publikimit të një raporti nga gazeta britanike “The Times”. Bëhet fjalë për pretendime se presidenti i institucionit, Gianni Infantino, ka përfituar shuma të majme financiare, konkretisht 1.6 milionë euro (1.9 milionë dollarë), të cilat nuk kanë qenë të pasqyruara në raportet e mëparshme. Këto fonde dyshohet se janë derdhur përmes një kompanie të ngarkuar me organizimin e Kupës së Botës në Miami. Këto zbulime kanë ringjallur debate të forta mbi transparencën dhe integritetin e drejtuesit më të lartë të futbollit. Nga ana e saj, FIFA i ka hedhur poshtë kategorikisht këto akuza, duke paralajmëruar se do t’i bëjë publike sërish specifikimet mbi pagën e Infantinos për të sqaruar situatën. Sipas dokumentacionit të publikuar nga “The Times”, thelbi i polemikës qëndron në ekzistencën e dy burimeve të ndara të të ardhurave. Ndërsa paga zyrtare e Infantinos ishte deklaruar rregullisht në raportet vjetore të FIFA-s, shuma shtesë prej 1.9 milionë dollarësh, e siguruar nga entiteti përgjegjës për organizimin e Kupës së Botës 2026 në SHBA, kishte mbetur e pazbuluar. Detajet e këtij transaksioni kanë dalë në dritë pas një deklarimi të dorëzuar në Shërbimin e të Ardhurave të Brendshme (IRS) të SHBA-së nga kompania FWC2026 US Inc. Raporti shton se këto pagesa, të cilat nuk figuronin në pasqyrat e FIFA-s, janë përdorur pjesërisht për të mbuluar shpenzimet e jetesës së presidentit në Miami, duke përfshirë këtu edhe qiranë e një vile luksoze në zonën e njohur “Sunset Islands”. Në një reagim zyrtar, FIFA ka sugjeruar se këto zbulime mediatike nuk janë të rastësishme. Organizata beson se bëhet fjalë për një strategji të orkestruar nga disa konfederata, përfshirë UEFA-n, me qëllim destabilizimin e pozitës së Infantinos përpara zgjedhjeve presidenciale, të cilat pritet të zhvillohen më 18 mars në Rabat.