Paradoksi i futbollit shqiptar: Suksesi që nderoi kombin përballë neglizhencës shtetërore

Përderisa Kombëtarja shqiptare u shndërrua në simbol krenarie dhe bashkimi për mbarë shqiptarët, realiteti i futbollit vendas mbetet i mbërthyer në një paradoks të trishtë. Ndërkohë që shteti arkëton miliona euro nga suksesi i sportistëve, mbështetja direkte për klubet mungon, ndërsa Ligji i Sponsorizimit vijon të qëndrojë i bllokuar në sirtaret e burokracisë, duke penguar zhvillimin e një sektori që mban gjallë shpresën e mijëra të rinjve. Shteti ka përfituar rreth 1.5 milionë euro vetëm nga tatimet mbi shpërblimet e lojtarëve të Kombëtares pas pjesëmarrjes në Europian. Megjithatë, klubet shqiptare vazhdojnë të përballen me infrastrukturë të amortizuar dhe mungesë të theksuar të investimeve. Pyetja që shtrohet është legjitime: pse investimi për fusha, akademi dhe edukim sportiv shihet si barrë buxhetore, ndërsa projekte të tjera, shpesh nën hije dyshimesh për abuzime, gjejnë mbështetje të pashpjegueshme financiare? Ministria e Financave, e cila konsiderohet si pengesa kryesore për reformën, duket se kërkon llogaridhënie të tepruar për çdo qindarkë që kërkohet për futbollin. Kjo qasje godet drejtpërdrejt fëmijët e familjeve të zakonshme, të cilët nuk kanë mundësi për formim profesional jashtë vendit dhe presin një hapësirë dinjitoze për t'u zhvilluar në atdheun e tyre. Sporti nuk është lëmoshë, por një sistem që kërkon ligje të qarta për nxitjen e biznesit dhe infrastrukturë moderne. Premtimet e vitit 2019 për ndryshimin e ligjit brenda 100 ditësh kanë mbetur vetëm në letër. Ndërkohë, stadiumet e premtuara në qytete si Durrësi, Vlora apo Korça mbeten në fazën e projekteve, ndërsa stadiumi “Selman Stërmasi” mbetet një dëshmi e heshtur e degradimit të infrastrukturës sportive. Kjo vonesë e pajustifikuar po mban peng të ardhmen e futbollit shqiptar. Ironia thellohet kur shohim pasionin e shfaqur nga kreu i qeverisë për emrat e mëdhenj të futbollit botëror, si Mourinho, Ancelotti apo Mendes. Nëse Kryeministri gjen kohë dhe vullnet për të pritur yjet e futbollit ndërkombëtar, atëherë pse kjo vendosmëri nuk reflektohet në një ndërhyrje konkrete për të zhbllokuar Ligjin e Sponsorizimit? Sporti ka nevojë për veprime dhe jo për fasadë, pasi vetëm përmes një sistemi funksional, futbolli shqiptar mund të shndërrohet nga një pasion i lënë pas dore në një industri të mirëfilltë.