Shtetet e Bashkuara ndryshojnë strukturën e forcave në Kosovë: Ja çfarë pritet të ndodhë me misionin e KFOR-it

Ushtria amerikane ka njoftuar një riorganizim të rëndësishëm të trupave të saj brenda misionit të KFOR-it në Kosovë. Në kuadër të rotacionit të planifikuar, Regjimenti i 2-të i Kalorësisë dhe njësi mbështetëse nga Divizioni i Parë i Këmbësorisë do të zëvendësojnë Grupin Luftarak të Brigadës së 53-të të Këmbësorisë të Gardës Kombëtare të Floridës. Ndërkohë, ndryshime do të ketë edhe në komponentin ajror, ku pjesëtarë të Brigadës së Aviacionit Luftarak të Divizionit të Parë të Këmbësorisë do të marrin stafetën nga Batalioni i 2-të i Regjimentit të 135-të të Aviacionit të Gardës Kombëtare të Kolorados. Këto lëvizje vijnë pas një rishikimi të detajuar nga Shtabi i Lartë i Fuqive Aleate në Evropë (SHAPE) dhe synojnë optimizimin e mëtejshëm të misionit të NATO-s në Kosovë. Sipas njoftimit zyrtar nga Ushtria Amerikane në Evropë dhe Afrikë, ky riorganizim reflekton përmirësimin e situatës së sigurisë në terren. Ky proces mbështet një qasje graduale, duke u përshtatur me modelin 'NATO 3.0', ku aleatët evropianë po marrin përgjegjësi më të mëdha. Po ashtu, ky rotacion shënon një zhvendosje të fokusit nga forcat e Gardës Kombëtare te trupat e angazhuara përmes strukturave të përhershme ushtarake për dislokime jashtë vendit. Koloneli Samuel Sargent, duke reflektuar mbi punën e Brigadës së 53-të të Këmbësorisë, u shpreh krenar për kontributin e dhënë. “Shërbimi përkrah aleatëve në Kosovë ka qenë nder për ne. Jemi të bindur se njësia pasardhëse do të vazhdojë misionin për të garantuar një mjedis të sigurt për të gjitha komunitetet,” deklaroi ai. Nga ana tjetër, koloneli Jabari M. Miller, komandanti i ardhshëm i Komandës Rajonale – Lindje, theksoi gatishmërinë e lartë të trupave të tij. “Divizioni i Parë i Këmbësorisë dhe Regjimenti i 2-të i Kalorësisë janë plotësisht të përgatitur për këtë detyrë. Jemi të motivuar për të ruajtur paqen dhe stabilitetin, në përputhje me Rezolutën 1244 të Këshillit të Sigurimit të OKB-së,” u shpreh Miller, duke falënderuar njëkohësisht paraardhësit për punën e tyre të jashtëzakonshme. Shtetet e Bashkuara rikonfirmuan përkushtimin e tyre të palëkundur për stabilitetin në Ballkanin Perëndimor, duke bërë të ditur se do të vazhdojnë bashkëpunimin e ngushtë me aleatët e NATO-s gjatë gjithë këtij procesi tranzicioni.