Skandal mjedisor në Skenderaj: Ndalohet aktiviteti i kompanisë “Drena” dhe gjobitet me 3 mijë euro

Ministrja e Mjedisit, Fitore Pacolli, ka bërë të ditur se Inspektorati i Ministrisë së Mjedisit, Planifikimit Hapësinor dhe Infrastrukturës (MMPH), në bashkëpunim të ngushtë me Institutin Hidrometeorologjik të Kosovës (IHMK), kanë ndërmarrë një aksion inspektimi në terren ndaj subjektit “Drena” me seli në Skenderaj, kompani kjo e njohur për prodhimin e lëngjeve të markës “RUKO” dhe artikujve të bylmetit. Gjatë kontrollit zyrtar, autoritetet kanë konstatuar se ky operator ekonomik shfrytëzonte katër puse private për nevojat e linjës së prodhimit të lëngjeve, duke nxjerrë deri në 10 mijë litra ujë në ditë. Megjithatë, i gjithë ky proces zhvillohej në kundërshtim me ligjin, pasi ujërat e shkarkuara përfundonin pranë shtratit të lumit Klina pa poseduar fare Lejen Ujore të lëshuar nga dikasteri qeveritar. Si rezultat i këtyre shkeljeve, Inspektorati ka urdhëruar ndalimin e menjëhershëm të shfrytëzimit të ujit për këtë linjë prodhimi, masë e cila do të mbetet në fuqi derisa kompania të pajiset zyrtarisht me lejen përkatëse. Parregullsi ligjore janë evidentuar edhe në linjën e përpunimit të qumështit të këtij biznesi. Për shkak të mungesës së një impianti adekuat për trajtimin e ujërave të ndotura, ndaj subjektit është shqiptuar një gjobë prej 3 mijë eurosh, teksa është lënë detyrim i prerë instalimi dhe funksionalizimi i menjëhershëm i impiantit të ujërave të përdorura. Institucionet e vendit kanë theksuar se zhvillimi dhe rritja e bizneseve vendore është prioritet, por kjo duhet të bëhet në përputhje të plotë me dispozitat ligjore dhe në funksion të ruajtjes dhe mbrojtjes së pasurive natyrore të vendit.