Tentuan t'i vënë flakën një biznesi, zjarri u shpëton nga kontrolli dhe djeg makinën e gabuar

Një ngjarje e rëndë ka ndodhur në orët e para të mëngjesit të sotëm në rrugën “Mustafa Qosja”, ku dy persona ende të paidentifikuar kanë tentuar t’i vendosin flakën një biznesi. Autorët kanë hedhur lëndë djegëse në shkallët e jashtme të subjektit në pronësi të shtetases me iniciale A. B., me qëllim shkaktimin e një zjarri të qëllimshëm. Megjithatë, plani i tyre ka rezultuar i dështuar dhe me pasoja të padëshiruara. Për shkak të përhapjes së flakëve, zjarri ka përfshirë dhe ka dëmtuar pjesërisht një automjet të parkuar aty pranë, i cili ishte në pronësi të shtetases R. H., dhe jo të shënjestrës së tyre. Aktualisht, grupi hetimor është duke punuar intensivisht në vendin e ngjarjes. Puna po përqendrohet në sigurimin e provave për identifikimin dhe kapjen e autorëve të këtij krimi, si dhe në dokumentimin e plotë të rrethanave në të cilat ndodhi ky incident.