Gasperini i palëkundur para duelit me Real Madridin: Nuk heqim dorë nga stili ynë i lojës

Për kryeqytetasit e Romës ky është një çast tejet i favorshëm dhe skuadra mezi pret të matë forcat me një ndër klubet më elita në kontinent. Skuadra italiane po përgatitet të luajë ndeshjen e saj të parë si vendase në Ligën e Kampionëve pas një mungese prej shtatë vitesh, një duel ky që përkon edhe me rikthimin e Jose Mourinhos në stadiumin “Olimpico”. Përballë heqen me një Real Madrid që, pavarësisht sfidave kalimtare, mbetet një superfuqi e futbollit evropian. Pavarësisht kësaj, tekniku Gian Piero rrezaton besim të plotë dhe këmbëngul se identiteti taktik i skuadrës së tij do të mbetet i pandryshuar në këtë përballje madhore. “Për ne është një moment i mirë dhe kemi dëshirë të matemi me njërën prej skuadrave më të mira në Evropë. Real Madridi ndoshta ka nevojë për pak kohë për t’u përshtatur, pasi ka ndryshuar trajnerin dhe mënyrën e lojës. Por të mos harrojmë se e ka mposhtur Interin. Do të jetë një ndeshje prestigjioze, e rëndësishme edhe për renditjen, por ne jemi gati”, u shpreh Gasperini gjatë konferencës për shtyp. Duke shmangur paralelizmat e panevojshme me kundërshtarin spanjoll, trajneri vuri theksin te barazia në fushën e blertë dhe te besimi që japin paraqitjet e fundit në kampionat. “Nuk duhet ta krahasojmë veten me Real Madridin si skuadër, por në fushë duhet të përballemi me të në kushte të barabarta. Kemi luajtur mirë kundër Interit dhe Comos, që janë ndër skuadrat më të forta në Itali. Tani duam të shohim se sa konkurrues mund të jemi në Evropë”, shtoi ai. I pyetur mbi mundësinë e një mbrojtjeje më të ngjeshur për të frenuar madrilenët, kreu i stafit teknik sqaroi se filozofia e verdhekuqve nuk do të ndryshojë. “Në Como u detyruam të luanim në atë mënyrë, por qasja jonë e zakonshme na ka sjellë rezultate shumë të mira. E njoh fuqinë sulmuese të Real Madridit. Shpesh, atij i duhet shumë pak për të krijuar raste të rrezikshme. Megjithatë, nuk besoj se Roma duhet të heqë dorë nga karakteristikat e veta. Do të mbetemi besnikë ndaj stilit tonë”, theksoi trajneri. Në planin afatgjatë, Gasperini synon që Roma të ndjekë hapat dhe rrugëtimin e suksesshëm të Atalantës në skenën ndërkombëtare gjatë viteve të fundit. “Duhet të bashkohen shumë faktorë. Atalanta u ngjit gradualisht në renditje derisa arriti të luante në çerekfinalet e Ligës së Kampionëve. Sot është e vështirë për çdo skuadër italiane të arrijë diçka edhe më të madhe. Nuk mund të shpallim objektiva madhështorë në Ligën e Kampionëve. Duhet të punojmë mirë, hap pas hapi, sepse rruga është ende e gjatë”.