Bayern Mynihu i dërgon mesazh të prerë Real Madridit: Michael Olise nuk lëviz nga Gjermania

Paraqitjet e jashtëzakonshme të Michael Olise kanë rikthyer vëmendjen te e ardhmja e tij, teksa francezi vazhdon të shkëlqejë në fushën e blertë. Gjatë merkatos së verës së kaluar, talenti i madh ishte në krye të listës së dëshirave të Florentino Pérez për të përforcuar skuadrën e Real Madridit, mirëpo drejtuesit e Bayernit e bënë të qartë se nuk ishin të gatshëm të dëgjonin asnjë ofertë për një prej shtyllave të tyre kryesore. Krahas kësaj, gjiganti bavarez ka nisur punën për t'i zgjatur bashkëpunimin aktual, i skadimi i të cilit është parashikuar për në vitin 2029. Në një prononcim të dhënë për median prestigjioze gjermane “Bild”, presidenti i klubit, Herbert Hainer, ka dërguar një qëndrim të panëkushtëzuar drejt kryeqytetit spanjoll. “Në lidhje me zërat që qarkulluan verën e kaluar për një interesim të mundshëm nga Real Madridi, mund të konfirmoj me bindje të plotë se Bayerni gjendet në një pozitë ku nuk ka asnjë detyrim financiar për të hequr dorë nga futbollistët e vet. Ne i marrim vendimet tona nga një pozicion force. Olise është i lidhur me klubin deri në vitin 2029 dhe shpresoj shumë që ai ta zgjasë këtë marrëveshje”, u shpreh Hainer. Sipas informacioneve të publikuara nga e njëjta gazetë, 25-vjeçari po kërkon që në marrëveshjen e re të përfshihet një klauzolë e caktuar lirimi, e cila do t'i jepte atij lirinë e largimit në momentin e duhur. Për ta bindur përfundimisht, drejtuesit e Bayernit janë gati ta shndërrojnë atë në futbollistin më të paguar të organikës, duke e vendosur në të njëjtin rang financiar me Harry Kane dhe Jamal Musiala, të cilët arkëtojnë rreth 25 milionë euro në bazë vjetore. Kujtojmë se sulmuesi anësor u transferua në radhët e bavarezëve gjatë vitit 2024 nga Crystal Palace, kundrejt një shifre prej 53 milionë eurosh. Gjatë kësaj interviste, kreu i klubit gjermani nuk la pa përmendur as çështjen e rinovimit të sulmuesit anglez Harry Kane. “Jam tejet optimist për këtë çështje. Negociatat po ecin në rrugën e duhur dhe me ritme pozitive. Harry dhe familja e tij janë ambientuar në mënyrë të përsosur në Mynih. Kam besim se arritja e një marrëveshjeje të re do të zyrtarizohet në një kohë të shkurtër”, përfundoi ai.