I kërkuar për tradhti të lartë nga Kievi, oligarku ukrainas siguron pasaportën serbe

Ish-deputeti dhe manjati ukrainas Vadym Novynskiy, i cili ndodhet në arrati dhe kërkohet në vendlindjen e tij nën akuzat për tradhti të lartë, është bërë zyrtarisht shtetas i Serbisë. Dokumenti për pajisjen e tij me shtetësi u bë publik të premten përmes Gazetës Zyrtare, ndërsa mbante firmën e kryeministrit të Serbisë, Gjuro Macut, e vendosur një ditë më herët. Në këtë vendim, ekzekutivi serb ka anashkaluar kanalet e zakonshme administrative, duke u mbështetur në një dispozitë ligjore që lejon pajisjen e një të huaji me pasaportë serbe përmes një kalimi të përshpejtuar, nëse ky veprim vlerësohet si “interes shtetëror”. Deri në momentin e publikimit të këtij artikulli, qeveria në Beograd ka refuzuar t'i përgjigjet pyetjeve rreth motiveve që çuan në këtë vendim dhe se si përbën kjo interes kombëtar për Serbinë. Heshtje totale për këtë çështje ka mbajtur gjithashtu edhe Ministria e Punëve të Brendshme e Serbisë. Me këtë veprim, Novynskiy i shtohet listës prej qindra shtetasish të huaj të cilët, gjatë qeverisjes së Partisë Përparimtare Serbe të udhëhequr nga Aleksandar Vuçiq, kanë përfituar dokumentet e udhëtimit të Serbisë përmes rrugës së shkurtuar. Kujtojmë se që nga nisja e agresionit ushtarak rus në Ukrainë në shkurt të vitit 2022, praktika e dhënies së shtetësisë përmes kësaj metode ka përfshirë edhe qindra shtetas rusë, për të cilët është konfirmuar se kanë lidhje të ngushta me regjimin e Vladimir Putinit. Kush është Vadym Novynskiy? Novynskiy njihet si biznesmen dhe ish-parlamentar ukrainas, ndaj të cilit autoritetet hetuese në Ukrainë kanë lëshuar urdhër-arresti ndërkombëtar me pretendimin se ai është bashkëpunëtor dhe “kujdestar i Kishës Ortodokse Ruse në Ukrainë”. Menjëherë pas fillimit të pushtimit rus në fillim të vitit 2022, ai u largua nga Ukraina dhe më vonë u vendos në Kroaci, ku bleu një pronë të gjerë prej mbi 1.400 metrash katrorë banimi dhe parcela tokësore që kapin sipërfaqen e mbi 2.5 hektarëve, të mbjella me vreshta e pemishte. Përfaqësuesi ligjor i oligarkut, përmes një njoftimi nga një zyrë avokatie spanjolle, ka theksuar se Novynskiy është “një mbështetës i palëkundur i Ukrainës” dhe se “prej kohësh është vënë në shënjestër të sanksioneve nga Federata Ruse, çka sipas tij hedh poshtë çdo aludim për lidhje me strukturat ruse”. Megjithatë, dokumentacioni i dorëzuar nga avokati nuk përmban fakte që vërtetojnë ekzistencën e sanksioneve ruse ndaj tij. Përkundrazi, raportimet e mëparshme tregojnë se masat ndëshkimore të Moskës ndaj tij ishin hequr që në vitin 2020 dhe nuk janë vendosur sanksione të reja. Në të njëjtën letër, avokati vlerëson se “përpjekjet për të damkosur, diskredituar dhe kriminalizuar zotin Novynskiy janë plotësisht të papranueshme”. Në mars të këtij viti, pas një periudhe të gjatë mungese në publik, Novynskiy dha një intervistë për mediumin gjerman Compact.TV, e cila u shoqërua me titullin provokues: “Ky oligark dëshiron ta rrëzojë Zelenskyn!”, duke e cilësuar atë si “një lloj Elon Musku i Ukrainës: sipërmarrës, politikan dhe ndër njerëzit më të pasur që tani përndiqet nga presidenti Zelensky për shkak të kundërshtimit të tij ndaj politikës luftarake”. Gjatë asaj bisede, biznesmeni e kritikoi ashpër presidentin ukrainas Volodymyr Zelensky, duke ndarë pikëpamjet e tij rreth konfliktit me Rusinë, përdorimin e gjuhës ruse, Marrëveshjet e Minskut, sanksionet personale dhe ndalimin e Kishës Ortodokse të Ukrainës – e cila konsiderohet si ndër institucionet më të mëdha fetare në vend dhe shihet si e lidhur ngushtë me Moskën. “Gjëja më e rëndësishme për sigurinë e Ukrainës mbeten raportet miqësore me Rusinë. Gjithçka tjetër është absurde. Nëse Ukraina gëzon marrëdhënie të mira...