Ursula von der Leyen ashpër ndaj sulmeve në Detin e Zi: Akt i papranueshëm, autorët para drejtësisë

Presidentja e Komisionit Evropian, Ursula von der Leyen, ka reaguar ashpër ndaj sulmeve me dronë që kanë shënjestruar anijet tregtare pranë bregdetit bullgar në Detin e Zi, duke kërkuar ndëshkimin e menjëhershëm të autorëve. Përmes një postimi në rrjetin social X, ajo ka tërhequr vëmendjen se kjo zonë detare po shndërrohet gjithnjë e më shumë në një vatër të re tensioni dhe përshkallëzimi të agresionit rus kundër Ukrainës. “Deti i Zi është bërë një tjetër front për përshkallëzimin e luftës së Rusisë në Ukrainë. Kjo është e papranueshme”, ka deklaruar ajo në mesazhin e saj. Ndërkaq, numri një i ekzekutivit evropian ka vënë theksin te nevoja urgjente që përgjegjësit e këtyre akteve të mbahen përgjegjës para ligjit për dëmet e shkaktuara. Këto sulme me dronë në afërsi të ujërave bullgare kanë ngritur alarmin ndërkombëtar lidhur me sigurinë e lundrimit dhe stabilitetin e korridoreve tregtare në Detin e Zi, një hapësirë me rëndësi jetike për transportin detar global, e cila vazhdon të mbetet e ekspozuar ndaj pasojave të konfliktit në Ukrainë.