Zgjerohet trashëgimia: 13 pasuri të reja kulturore nën mbrojtje të përkohshme në Kosovë

Lista e trashëgimisë kulturore në Kosovë është pasuruar me 13 asete të reja, të cilat tashmë janë vënë zyrtarisht nën mbrojtje të përkohshme. Ky vendim është bërë i ditur publikisht nga ministrja e Kulturës dhe Turizmit, Saranda Bogujevci. Sipas të dhënave të bëra publike nga ministrja, në këtë listë të re përfshihen lokalitete me rëndësi arkeologjike, kala antike, kulla tradicionale, shtëpi me vlerë historike, si dhe komplekse të ndryshme industriale e familjare. Këto objektet dëshmojnë trashëgiminë e pasur nga epoka të ndryshme dhe format e jetesës në rajone të ndryshme të vendit. Mes pasurive të sapofutura në mbrojtje spikasin kompleksi industrial i Tulltores në Prishtinë, Gjyteti i Gjyrgjedellit në Kaçanik, Kalaja e Dafinës në Rahovec, Kulla e Asllanit në Tërdec të Drenasit, shtëpia muze e Latif Berishës në Mitrovicën e Veriut, si dhe kompleksi i familjes Çollaku në Zym të Prizrenit. Nëpërmjet këtij hapi institucional synohet evidentimi dhe vlerësimi i duhur i pasurive që mbartin vlera të larta historike dhe kulturore, me qëllim që ato të integrohen në mekanizmat ekzistues ligjorë për mbrojtjen e trashëgimisë. Ky zhvillim përbën një garanci shtesë për ruajtjen e këtyre monumenteve dhe përcjelljen e vlerave të tyre autoktone për brezat e ardhshëm.