Masë ndalimi prej 48 orësh për Gani Gecin pas denoncimit nga gazetari Lirim Mehmetaj

Autoritetet kompetente kanë ndaluar për 48 orë Gani Gecin, pasi ky i fundit është shoqëruar në stacionin policor dhe është marrë në pyetje nga hetuesit e Departamentit të Krimeve të Rënda. Operacioni i shoqërimit të Gecit është kryer gjatë orëve të mbrëmjes, ndërsa ky vendim vjen si pasojë e një kallëzimi penal të bërë nga gazetari Lirim Mehmetaj, i cili ka bërë publike pretendimet se është vënë në shënjestër të kërcënimeve nga ana e familjes Geci. Gjatë paraqitjes së tij në emisionin televiziv “Debat Plus”, Mehmetaj shpjegoi se individë nga familja Geci i kishin bërë presion që të fshinte ose të ndryshonte një shkrim të tij kritik drejtuar deputetit të Lëvizjes Vetëvendosje, Fatos Geci, kërkesë të cilën ai e kishte hedhur poshtë. Sipas dëshmisë së gazetarit, menjëherë pas këtij refuzimi ai është përballur me kanosje, çka e ka shtyrë atë që ngjarjen ta paraqesë zyrtarisht pranë Policisë së Kosovës. “Në mëngjes kam shku në polici, e kam njoftu rastin”, ka deklaruar Mehmetaj për zhvillimet rreth kësaj ngjarjeje.