Procesi i integrimit, Shqipëria shënon kthesë të rëndësishme në rrugën drejt Bashkimit Evropian

Kryeministri i vendit, Edi Rama, ka ndarë me publikun një lajm të rëndësishëm për ecurinë evropiane të Shqipërisë, duke konfirmuar se sot vendi ynë do të hedhë një tjetër hap konkret drejt anëtarësimit në familjen e madhe evropiane. Nëpërmjet një shkrimi të shpërndarë në rrjetet sociale, kreu i ekzekutivit shqiptar ka njoftuar se gjatë punimeve të Konferencës së 10-të të Negociatave të Anëtarësimit, e cila po mbahet në Luksemburg, do të zyrtarizohet mbyllja e Kapitullit 20. Sipas vlerësimit të kryeministrit, ky zhvillim përbën një arritje domethënëse dhe një gur themeli në kuadër të përmbushjes së reformave dhe detyrimeve që i afrojnë standardet e vendit me ato të Bashkimit Evropian.