Operacion dramatik në Vlorë: Humb orientimin dhe lëndohet në këmbë, shpëtohet turisti amerikan

Një operacion shpëtimi i kurorëzuar me sukses është zhvilluar mbrëmjen e sotme në zonën e Bristanit në Vlorë, ku një shtetas amerikan ka mbetur i bllokuar pasi është dëmtuar në gjymtyrë dhe ka humbur orientimin në terrenin e vështirë. Sipas të dhënave paraprake, alarmi për turistin që kishte nevojë urgjente për ndihmë është dhënë rreth orës 18:00. Për lokalizimin e tij është ngritur menjëherë një grup pune nga forcat e Njësisë Speciale Delta, të cilët kanë krehur zonën përmes operacioneve tokësore. Pas rreth tre orësh kërkimesh intensive, falë ndërhyrjes së strukturave speciale, rreth orës 20:45, turisti amerikan është arritur të gjendet shëndoshë e mirë në vendin ku kishte humbur. Aktualisht, shtetasi i huaj po transportohet drejt qytetit të Vlorës, ku do t'i nënshtrohet ekzaminimeve të nevojshme mjekësore për të marrë ndihmën e duhur shëndetësore dhe për të konstatuar gjendjen e tij fizike.