Beteja e ashpër për kujdestarinë: Djali 13-vjeçar i Halle Berry kërkon të dëshmojë në gjykatë kundër nënës

Konfliktet mes aktores së njohur Halle Berry dhe ish-bashkëshortit të saj, Olivier Martinez, kanë marrë një kthesë edhe më serioze, pasi ky i fundit ka dorëzuar dokumente të reja në gjykatë ku pretendon se djali i tyre 13-vjeçar, Maceo, kërkon të dëshmojë personalisht lidhur me pretendimet për dhunë fizike nga ana e nënës së tij. Sipas dëshmisë së paraqitur nga Martinez, i mituri kishte realizuar fotografi të aktores pas një incidenti të pretenduar në banesën e saj më 26 shtator. Babai i tij pohon se djali kishte vepruar në këtë mënyrë nga frika se dëshmia e tij verbale nuk do të merrej parasysh ose nuk do t'i besohej. Këto zhvillime janë pjesë e një përplasjeje të vazhdueshme ligjore mes ish-çiftit për çështjen e kujdestarisë. Në të njëjtën kohë, Martinez ka hedhur poshtë një kërkesë urgjente të ngritur nga Berry në gjykatë, duke e etiketuar atë si një lëvizje hakmarrëse. Ai e akuzon aktoren se po përpiqet ta paraqitë atë në dritë të gabuar, gjoja si një prind që po bllokon trajtimin mjekësor të fëmijës, ndërkohë që sipas tij, specialistët shëndetësorë, përfshirë pediatrin dhe psikiatrin e Maceos, kishin konstatuar se i mituri nuk kishte nevojë për medikamente në atë periudhë. Sipas pretendimeve të babait, dëshira e djalit është që të flasë hapur para gjyqtarit, të sqarojë se me cilin nga prindërit preferon të jetojë dhe të rrëfejë ngjarjet e ndodhura brenda shtëpisë së nënës nga këndvështrimi i tij. Ky zhvillim pason një urdhër të mëparshëm kufizues të siguruar nga Martinez kundër Berryt, pasi kishte pretenduar se ajo e kishte kapur djalin për fyti gjatë një konflikti të lindur për shkak të një loje në realitetin virtual. Në krahun tjetër, aktorja e njohur i ka kundërshtuar me forcë akuzat për dhunë, duke u mbrojtur me deklaratën se ngjarja në fjalë nuk ka qenë gjë tjetër veçse një lojë mundjeje mes tyre.