“Nuk pati arrestim” – Familja Geci sqaron ngjarjen: Gani Geci u paraqit vetë në polici

Pas lajmeve të qarkulluara në medie për një ndalim të mundshëm nga organet e rendit, ka reaguar menjëherë familja e Gani Gecit, duke hedhur poshtë pretendimet se ai është arrestuar nga Policia e Kosovës. Sipas sqarimit të bërë publik nga Rilind Geci dhe deklaratës së djalit të tij, Valdrin Geci, ngjarja ka ndodhur ndër po pinin kafe në një lokal në Prishtinë, konkretisht në “Che Bar”, në shoqërinë e disa miqve. Gjatë kësaj kohe, Gani Geci ka pranuar një thirrje telefonike nga zyrtarët policorë. Në vijim të sqarimit, theksohet se pas kësaj telefonate, ai ka marrë vendimin që të paraqitet vullnetarisht në stacionin e policisë për të ofruar sqarimet e nevojshme dhe për të dhënë deklaratën e tij zyrtare. “Pasi të përfundojë procesi i intervistimit, Gani Geci do të flasë vetë për të gjitha mediat për t'i dhënë fund shpifjeve rreth kinse arrestimit të tij”, thuhet ndër të tjera në reagimin e familjes. Në këtë mënyrë, familja Geci ka kundërshtuar fuqishëm raportimet e deritanishme, duke paralajmëruar se pas daljes nga intervista, vetë Gani Geci do të adresojë çështjen publikisht përmes një deklarate për mediat.