Gatishmëri e lartë operacionale: KFOR-i ndërmerr operacione logjistike në zonën e Pejës

Pjesëtarët e Batalionit Mbështetës të Komandës Rajonale-Perëndim të misionit të KFOR-it, të stacionuar në kampin “Villaggio Italia” në qytetin e Pejës, kanë ndërmarrë një sërë operacionesh logjistike me qëllim mbështetjen e trupave të vendosura në këtë zonë. Sipas njoftimit zyrtar, këto angazhime përfshijnë shërbimet e mirëmbajtjes për automjetet dhe pajisjet ushtarake, shpërndarjen e karburanteve, si dhe transportin e mjeteve dhe pajisjeve të ndryshme në terren. Qëllimi kryesor i këtyre operacioneve është ruajtja e nivelit të lartë të gatishmërisë së trupave paqeruajtëse dhe forcimi i kapaciteteve për të kryer me sukses detyrat anembanë rajonit. Nga KFOR-i bëhet e ditur se ky mision vijon të përmbushë mandatin e tij, i cili mbështetet në Rezolutën 1244 të Këshillit të Sigurimit të OKB-së të vitit 1999, duke synuar ruajtjen e një mjedisi të qetë dhe të sigurt për të gjithë banorët e Kosovës, si dhe sigurimin e lirisë së lëvizjes për këdo. Gjithashtu, trupat e NATO-s theksojnë se operojnë në mënyrë plotësisht neutrale dhe në bashkëpunim të ngushtë me Policinë e Kosovës dhe EULEX-in, secili duke vepruar brenda fushës së tij të kompetencave për sigurinë.