Kërcënimet e Vetëvendosjes ndaj tij, Përparim Rama i drejtohet Prokurorisë: Prishtina nuk udhëhiqet me presione

Kryetari i Komunës së Prishtinës, Përparim Rama, ka ngritur alarmul publik ndaj asaj që e ka cilësuar si një valë në rritje të kërcënimeve direkte që i adresohen nga figura politike dhe përfaqësues lokalë të Lëvizjes Vetëvendosje. Përmes një reagimi zyrtar, i pari i kryeqytetit u ka bërë thirrje urgjente institucioneve të rendit dhe ligjit që të ndërhyjnë dhe t'i trajtojnë me seriozitetin më të lartë këto presione, duke ngritur njëkohësisht dilemën nëse sistemi i drejtësisë në vend udhëhiqet nga instancat e pavarura apo dirigjohet nga zyrat partiake të kësaj lëvizjeje. “Kërcënimet ndaj meje nuk janë asgjë e re. Ato vetëm sa janë intensifikuar kohëve të fundit nga deputetë dhe asambleistë të Lëvizjes Vetëvendosje, të cilët marrin guximin të kërcënojnë në emër të shtetit dhe institucioneve të tij”, ka shkruar Rama në platformat e tij zyrtare. Ai ka vënë inftas në faktin se askush nuk gëzon të drejtën që të flasë e të kërcënojë në emër të shtetit, apo t'i shndërrojë institucionet publike në mjete presioni ndaj rivalëve politikë, gazetarëve dhe çdo zëri ndryshe në shoqëri. “Mandatin tim nuk ma ka dhënë asnjë militant dhe asnjë zyrë pushteti. Ma kanë dhënë qytetarët e Prishtinës. Dhe para tyre jap llogari për përgjegjësinë që kam marrë”, ka theksuar ai gjatë reagimit të tij. Sipas kreut të Prishtinës, përpjekjet për ta frikësuar përmes mjeteve politike nuk do të kenë sukses, ndërsa shtoi se funksionin e tij do ta ushtrojë me përkushtim të palëkundur dhe vendosmëri të plotë. “Mos e ngatërroni qetësinë me dobësi. As përmbajtjen me frikë. Ta keni të qartë, nuk më heshtni dhe nuk më ndalni”, ka shkruar Rama. Në fund të deklaratës së tij, kryetari i Prishtinës ka dhënë një mesazh të prerë duke përsëritur se “Prishtina nuk qeveriset me kërcënime”, por ajo drejtohet vetëm përmes vullnetit, votës dhe besimit të qytetarëve të saj.