Skandali financiar në Angli: Numri një i Manchester Cityt thyen heshtjen përmes një letre zyrtare

Kryetari i Manchester Cityt, Khaldoon Al Mubarak, ka dalë me një deklaratë zyrtare ku ka hedhur poshtë të gjitha akuzat, duke këmbëngulur në pafajësinë e plotë të klubit, pavarësisht pretendimeve se kampionët anglezë janë shpallur fajtorë për 114 shkelje të rregullave financiare, në të cilat përfshihet edhe marrëveshja paralele e ish-trajnerit Roberto Mancini. Klubi elitar i Premierligës rrezikon sanksione drastike, të cilat mund të variojnë nga dënimet me gjobë dhe zbritja e pikëve, e deri te zhveshja nga titujt e fituar apo edhe përjashtimi përfundimtar nga garat e kampionatit, nëse konfirmohet zyrtarisht shkelja në këto përmasa. Tërësia e 115 akuzave u zyrtarizua në muajin shkurt të vitit 2023, duke përfshirë dyshimet për mungesë transparence dhe pasaktësi në deklarimin e të ardhurave dhe pagesave për futbollistët dhe stafin teknik përgjatë periudhës kohore nga sezoni 2009/10 deri në atë 2017/18. Një nga pikat më të nxehta dhe më të diskutuara mbetet ajo e kompensimit financiar të Roberto Mancinit, aktualisht përzgjedhës i kombëtares së Italisë, e cila është cilësuar si një prej provave kryesore të shmangies së normave në fuqi. Hulumtimet e bëra publike vite më parë përmes korrespondencës elektronike të siguruar nga mediat ndërkombëtare, dëshmonin se strategu italian përfitonte një shifër prej 1.5 milionë paundësh në vit para tatimit nga Manchester City, e cila shoqërohej nga një kontratë shtesë prej 1.75 milionë paundësh me ekipin simotër, Al-Jazira. Marrëveshja e dytë ishte formuluar si shërbim konsulence, ndonëse detyrimet kontraktuale parashikonin vetëm katër ditë angazhim brenda një viti kalendarik. Sipas hetimeve, kjo skemë dyshohet se është përdorur me qëllim që të maskohej shuma reale e përfitimeve të Mancinit, duke i shpëtuar kështu kontrolleve të rrepta të UEFA-s dhe atyre të Premierligës. Pasditen e sotme, kreu i drejtrimit të Manchester Cityt, Khaldoon Al Mubarak, ka përdorur faqen zyrtare të skuadrës për të transmetuar një mesazh të qartë drejtuar opinionit publik dhe mbështetësve. “Ndërsa disa njerëz kanë nxituar të arrijnë në përfundimet e tyre dhe ndërsa ka kaq shumë zhurmë rreth nesh, asgjë nuk ka ndryshuar. Ne jemi përballur edhe më parë me sfida së bashku dhe kemi triumfuar. Ende ka shumë njerëz që duan të minojnë hovin e klubit tonë. Ne nuk do t’ua japim atë mundësi”, ka theksuar ai. Nëpërmjet njoftimit zyrtar, klubi gjithashtu ka bërë të ditur se procedurat ligjore pranë Premierligës janë ende të papërfunduara dhe vazhdojnë t'i nënshtrohen klauzolave strikte të konfidencialitetit. “Klubi i ka respektuar me përpikëri procedurat e rregullta për tetë vjet, mbi bazën se Bordi dhe drejtuesit ekzekutivë të Premierligës do të vepronin si një rregullator i pavarur, i paanshëm dhe i drejtë, i lirë nga ndikimet partiake”, theksohet në fund të reagimit.