Nis projekti i rëndësishëm infrastrukturor: Hapi i radhës për autostradën Shkup-Ohër

Kryeministri Hristian Mickoski ka njoftuar përmes një postimi në rrjetet sociale se kanë nisur zyrtarisht punimet për ndërtimin e segmentit rrugor Bukojçan – Kërçovë. Ky zhvillim është cilësuar si një hap tejet domethënës drejt finalizimit të lidhjes së plotë autostradale ndërmjet Shkupit dhe Ohrit. “Sot është fillimi i ndërtimit të aksit të autostradës Bukojçan – Kërçovë, edhe një projekt i rëndësishëm infrastrukturor dhe hap i rëndësishëm drejt qëllimit tonë të madh, lidhjen e plotë të Shkupit dhe Ohrit”, ka shkruar Mickoski. Kreu i ekzekutivit shtoi se përmes finalizimit të akseve Kërçovë – Ohër, Gostivar – Bukojçan, Tetovë – Gostivar dhe Bukojçan – Kërçovë, po vendoset një themel i fortë për një qarkullim më të shpejtë, standarde më të larta sigurie, të theksuara për të thithur investime të reja dhe për të stimuluar një hov më të madh ekonomik. “Pas viteve shtyrje dhe mundësive të humbura, Maqedonia meriton vepra, dhe jo arsyetime. Përderisa opozita vazhdon me kritika boshe dhe zënka politike, përgjigja jonë janë projektet konkrete që do t’u shërbejnë qytetarëve dhe gjeneratave të ardhshme”, u shpreh ai. Sipas kryeministrit, fokusi kryesor i Qeverisë mbetet puna e palodhur për zhvillimin e vendit dhe përmirësimin e infrastrukturës. “Veprat janë karakteristikë e jona, ndërkaq zhvillimi i Maqedonisë është obligimi ynë. Maqedonia po ndërtohet, po lidhet dhe po shkon përpara”, përfundoi Mickoski.