Krime lufte në Zveçan: Prokuroria Speciale ngre aktakuzë ndaj ish-komandantit të policisë

Prokuroria Speciale e Kosovës ka zyrtarizuar aktakuzën ndaj të pandehurit me inicialet M.Gj., i cili ngarkohet me veprën penale të rëndë “Krime lufte kundër popullsisë civile”. Sipas dokumentit të akuzës, ngjarjet datojnë gjatë periudhës 1998-1999 në territorin e komunës së Zveçanit. I pandehuri M.Gj., duke mbajtur pozitën e Komandantit të Repartit Policor në përbërjen rezervë dhe duke vepruar në bashkëkryerje me pjesëtarë të tjerë të forcave policore serbe, dyshohet se ka ushtruar përgjegjësi individuale dhe komanduese. Atij i faturohen vepra si vrasje, trajtim çnjerëzor, akte frikësimi, shkatërrim pronësor, si dhe dëbim masiv e spastrim etnik ndaj qytetarëve civilë. Në njoftimin e lëshuar theksohet se më 29 prill 1999, i pandehuri në bashkëpunim me pjesëtarë të tjera të paidentifikuar nga formacionet e strukturuara të Ushtrisë Jugosllave dhe policisë serbe, të pajisur me uniforma, kishin ndërmarrë një aksion ushtarako-policor për rrethimin e një fshati në Zveçan. “Gjatë operacionit, u vranë tre (3) banorë civilë, ndërsa shtatë (7) persona të tjerë u rrëmbyen, u dogjën shtëpi dhe u shkatërrua pasuri materiale. Trupat e gjashtë (6) prej tyre u gjetën në varrezat e fshatit Suhodoll, ndërsa trupi i viktimës së shtatë (7) ende nuk është gjetur. Rasti i është kaluar për shqyrtim Gjykatës Themelore në Prishtinë, ndërsa i pandehuri ndodhet në paraburgim”, shtohet në komunikatë.