Skena politike spanjolle ndryshon: Avokatja e njohur themelon forcën e re “Democracia21” për zgjedhjet e parakohshme

Panorama politike në Spanjë është pasuruar me një subjekt të ri, ndërsa avokatja e njohur Miriam Gonzalez ka hyrë zyrtarisht në garë përmes krijimit të partisë “Democracia21”. E martuar me politikanin britanik Nick Clegg, ish-zëvendëskryeministër i Mbretërisë së Bashkuar, ajo synon të sjellë një frymë të re dhe të “rigjenerojë politikën spanjolle”. Gjatë fundjavës, në kryeqytetin Madrid, u bë prezantimi zyrtar i kësaj lëvizjeje të re politike. Synimi kryesor i formacionit është t'i japë fund dominimit të partive tradicionale, duke u drejtuar te elektorati i qendrës dhe duke kërkuar njëkohësisht “rigjallërimin e demokracisë spanjolle”. E lindur në vitin 1968 në Olmedo të Valladolidit, Miriam Gonzalez vjen nga një familje mësuesish dhe u shkollua në Belgjikë falë një burse. Ajo është profesioniste e fushës së drejtësisë, e specializuar në tregtinë ndërkombëtare. Profili i saj publik mori një hov të madh gjatë viteve që kaloi në Britaninë e Madhe pranë bashkëshortit të saj Nick Clegg, i cili ka udhëhequr Liberal Demokratët dhe ka shërbyer si zëvendëskryeministër në periudhën 2010-2015 në qeverinë e koalicionit të drejtuar nga David Cameron. Veç karrierës juridike, Gonzalez ka themeluar organizatën bamirëse “Inspiring Girls”, ndërsa në Spanjë ka udhëhequr platformën qytetare “Espana Mejor”, e cila më pas shërbeu si bazë për kalimin në politikën aktuale partiake. Në ceremoninë e lançimit, ajo e cilësoi këtë hap si një përgjegjësi personale dhe “një borxh monumental” ndaj vendit për shkak të mundësive që i janë dhënë si mbesa e fermerëve. Ngjarja u mbështet edhe nga prania e bashkëshortit të saj Clegg, si dhe nga figura të njohura të ish-partisë “Union Progress and Democracy”, mes të cilëve Rafael Calduch, Fernando Maura dhe Beatriz Becerra. Pika qendrore e programit të saj zgjedhor është kriza e strehimit, që përbën shqetësimin më të madh për qytetarët spanjollë. Ajo ka hedhur idenë e një plani kombëtar për ngritjen e lagjeve të reja përmes konsensusit ndërpartiak, çka do t'i garantonte siguri ligjore këtij sektori për një periudhë dhjetëvjeçare. Projektbuxheti i saj parashikon eliminimin e çdo takse që lidhet me banimin për individët nën moshën 35 vjeç. Po ashtu, ajo u bën thirrje kryeministrit Pedro Sanchez dhe liderit të opozitës Alberto Nunez Feijoo që të rinegociojnë me Brukselin për 10 miliardë eurot e pashpenzuara nga fondet e Bashkimit Evropian për Gjeneratën e Ardhshme, me qëllim ngritjen e një fondi sovran për strehim të përballueshëm dhe të mbrojtur. Sa i përket çështjes së migracionit, themeluesja e “Democracia21” e konsideron atë si një vlerë të shtuar për Spanjën, por insiston se shteti duhet të vendosë rregulla të qarta për hyrjet dhe daljet. Një nga deklaratat e saj më të bujshme pas prezantimit kishte në fokus largimin e diskursit ksenofobik nga skena publike, duke nënvizuar se duhet përcaktuar me saktësi se kush hyn në vend, në çfarë mënyre dhe kur.