Zbulohen emrat e folësve për natën e 11-të të protestës “Jo në emrin tim” në Prishtinë

Përfaqësues të fushave të ndryshme të artit, gazetarisë dhe dëshmitarë të kohës do të jenë në qendër të vëmendjes gjatë natës së 11-të të protestës “Jo në emrin tim”. Ngjarja do të zhvillohet mbrëmjen e sotme, duke filluar nga ora 21:00, në sheshin “Skënderbeu” në kryeqytet. Lista e folësve dhe artistëve për këtë edicion përfshin aktorë, gazetarë dhe figura të njohura publike. Mes tyre janë aktori Adrian Morina, gazetari Arsim Lani, Fahri Fazliu (nipi i heronjve Fahri e Bahri Fazliu), si dhe sopranoja e njohur Arta Jashari. Organizatorët kanë bërë të ditur se programi do të hapet zyrtarisht me recitimin e Betimit të Ushtarit të UÇK-së, interpretim ky që do të bëhet nga veterani Halit Zogaj. Pas tij, podiumin do ta marrin organizatori i protestës, Çlirim Haziri, dhe nxënësja e gjimnazit “Sami Frashëri”, Olsa Hyseni, të cilët do të ndajnë mesazhet e tyre me qytetarët e pranishëm. Përveç fjalimeve, agjenda e mbrëmjes rezervon edhe momente artistike dhe emocionale. Të pranishmit do të kenë mundësinë të ndjekin shfaqjen e videos dokumentare “Rrëfimi i ushtarit”, ndërsa atmosfera do të kulmojë me performancën e sopranos Arta Jashari, e cila do të ekzekutojë këngën e mirënjohur “Jam Kosova e Shqiptarisë”.