Pas dëbimit nga Mali i Zi për arsye sigurie, blogeri i njohur rus kthehet në Moskë përmes Serbisë

Mikhail Zvinchuk, themeluesi i kanalit të njohur në Telegram "Rybar" dhe njëherësh bloger rus, është kthyer në Rusi pasi është dëbuar nga Mali i Zi. Ai u largua nga territori malazez së bashku me bashkëshorten dhe tre bashkëpunëtorë të tij, për shkak të shqetësimeve që autoritetet vendase i lidhën me sigurinë kombëtare dhe të brendshme. Pas ndalimit, grupi fillimisht udhëtoi nga Podgorica drejt Beogradit, për të marrë më pas fluturimin drejt kryeqytetit rus. Me mbërritjen e tij në Moskë, Zvinchuk deklaroi për mediat vendase se në procesin e lirimit dhe të riatdhesimit të tij ishin angazhuar drejtpërdrejt institucionet shtetërore të Rusisë, përfshirë diplomacinë dhe Ministrinë e Punëve të Jashtme. Megjithatë, ai bëri të ditur se pajisjet e konfiskuara gjatë operacionit të ndalimit në Mal të Zi, ku përfshihen një dron dhe disa kamera, ende nuk i janë dorëzuar. Sipas tij, Ambasada ruse po jep mbështetjen e nevojshme për zgjidhjen e kësaj çmështjeje. Incidenti ndodhi të premten, më 9 tetor, kur Zvinchuk dhe ekipi i tij u ndaluan nga forcat e rendit në komunën e Kotorrit. Gjatë kontrollit dhe bastisjes së ushtruar, autoritetet u sekuestruan pajisje digjitale, përfshirë aparatura me rezolucion të lartë, një dron, kamera të llojeve të ndryshme dhe disa aparate telefonike. Policia malazeze njoftoi se mjetet e konfiskuara do t'i nënshtrohen një ekspertize të detajuar teknike dhe analizave të thella, me qëllim që të zbardhet përdorimi i tyre i saktë gjatë qëndrimit në vend. Vendimi për dëbimin e tyre u mor nga strukturat policore të Malit të Zi mbi bazën e arsyeve të sigurisë kombëtare. Para se të hynte në territorin malazez, Zvinchuk kishte zhvilluar vizita në Serbi dhe në Bosnje dhe Hercegovinë. Gjatë kësaj kohe, ai dhe ekipi i tij dyshohet se ishin angazhuar në xhirimin e një materiali dokumentar që trajtonte raportet ndërmjet Rusisë dhe rajonit të Ballkanit. Nga ana e tyre, përfaqësuesit e kanalit "Rybar" pretenduan se të katër shtetasit rusë kishin qëndruar në mënyrë plotësisht ligjërore në Mali i Zi dhe kishin pasur në plan filmimin e Manastirit të Cetinës, për çka kishin dorëzuar paraprakisht edhe një kërkesë zyrtare. "Rybar" funksionon si një rrjet mediatik e informativ, i krijuar në vitin 2018 nga vetë Zvinchuk, i cili më parë ka shërbyer në shërbimin për shtyp të Ministrisë së Mbrojtjes së Rusisë. Gjatë zhvillimit të luftës në Ukrainë, ky kanal u shndërrua në një ndër platformat ushtarake proruse me ndikimin më të lartë në rrjetin social Telegram. Kujtojmë se Zvinchuk ndodhet nën sanksionet e Bashkimit Evropian qysh prej vitit 2023, për shkak të mbështetjes publike që i ka dhënë agresionit ushtarak rus në Ukrainë dhe përhapjes së materialeve propagandistike. Sipas institucioneve të BE-së, ai bën pjesë në një grup pune të ngritur nga presidenti Vladimir Putin për të bashkërenduar fushatat e mobilizimit lidhur me konfliktin ukrainas. Ndërkohë, Shtetet e Bashkuara dhe Britania e Madhe e kanë cilësuar rrjetin "Rybar" si një instrument të përfshirë në operacione të ndikimit të huaj dhe luftë hibride informative. Në vitin 2024, Departamenti amerikan i Shtetit, në kuadër të programit "Rewards for Justice", vuri në dispozicion një shpërblim deri në 10 milionë dollarë për informacione që çojnë te personat e lidhur me këtë projekt mediatik, duke ngritur dyshime të forta për veprimtari të paligjshme ndikimi.