Kërcënimi rus, gjenerali i lartë i NATO-s: Misioni ynë është pengimi i agresionit, jo nxitja e tensioneve

Gjatë vizitës së tij në Poloni për Forumit të Sigurisë së Varshavës (WSF), Komandanti Suprem i Forcave Aleate të NATO-s për Evropën, gjenerali Alexus Grynkewich, ka trajtuar sfidat e sigurisë në kontinent, sfidat aktuale dhe nivelin e gatishmërisë së Aleancës Veriatlantike. Ditën e hënë, gjenerali Grynkewich pritet të mbajë një fjalim në këtë aktivitet, ku do të bëjë publike atë që ai e ka cilësuar si “Teoria e Fitores së NATO-s”. Sipas shpjegimit të tij, kjo qasje përcakton qartësisht “mënyrën se afrimit të trupave në operacione në skenarë konflikti”. Megjithatë, ai ka vënë në pah se, duke qenë një organizatë me natyrë mbrojtëse, ky koncept mbështetet thelbësisht te “strategjia e mohimit”. Kjo do të thotë se kundërshtarit i pamundësohet realizimi i qëllimeve të tij, ndërkohë që e gjithë kësaj i jepet një rol kyç parandalues. Çdo aktor i mundshëm armiqësor duhet të jetë i vetëdijshëm se “ne kemi një plan dhe jemi të gatshëm ta vëmë në jetë”, gjë që sipas tij duhet ta detyrojë palën tjetër të kuptojë se “sulmi ndaj nesh është i papranueshëm sepse aleanca është e përgatitur të reagojë”. “Duke qenë se jemi një aleancë mbrojtëse, nuk synojmë në asnjë mënyrë ngritjen e tensioneve dhe nuk kemi asnjë shtysë për ta bërë diçka të tillë. Qëllimi ynë i vetëm është të garantojmë se askush nuk guxon të na kanoset, dhe kjo mbetet prioriteti ynë kryesor”, u shpreh Grynkewich. Duke analizuar situatën aktuale, komandanti ushtarak vlerësoi se rreziku i një agresioni të gjerë rus kundër ndonjë vendi anëtar mbetet “në nivele relativisht të ulëta”, kryesisht për shkak se kapacitetet ushtarake të Moskës janë të angazhuara plotësisht në Ukrainë. Megjithatë, ai garantoi se çdo cënim ndaj Polonisë apo shteteve baltike do të marrë një kundërpërgjigje të menjëhershme, ndonëse fokusi mbetet te parandalimi. “Kemi kapacitete për t'u kundërpërgjigjur me shpejtësi të lartë, por synimi ynë është ta ndalim rrezikun që në nisje. Suksesi ynë arrihet përmes parandalimit, shfaqjes së fuqisë sonë dhe dëshmisë së unitetit që qëndron pas kësaj fuqie. Shpresoj sinqerisht të mos ndodhë kurrë momenti i një kundërpërgjigjeje të tillë, sepse do t’i ndalim kundërshtarët para se ata të konsiderojnë ndonjë hap kundër aleancës sonë”, përfundoi ai.