Fundjavë e mbingarkuar në QKUK, afër një mijë pacientë marrin ndihmë mjekësore emergjente

Fluks i lartë i pacientëve është regjistruar gjatë tri ditëve të fundit në Qendrën Klinike Universitare të Kosovës (QKUK). Sipas të dhënave zyrtare të publikuara nga Shërbimi Spitalor Klinik dhe Universitar i Kosovës (SHSKUK), ekipet mjekësore në Klinikën Emergjente kanë trajtuar gjithsej 989 raste gjatë kësaj periudhe. Në bazë të raportit të fundjavës, angazhimi i stafit mjekësor është shtrirë në disa sektorë të ndryshëm. Konkretisht, në njësinë e Reanimimit kanë marrë trajtim 241 pacientë, ndërsa numri i rasteve të trajtuara në Emergjencën Internistike ka arritur në 300. Po ashtu, ndihmë mjekësore u është ofruar edhe 175 pacientëve në Emergjencën Kirurgjike dhe 213 të tjerëve në atë Ortopedike, ndërsa në Sallën e Vogël janë kryer ndërhyrje dhe shërbime për 60 pacientë.