Zbardhet vendimi për Pogradecin: Drejtësia i jep “stop” kërkesës së Denis Meçes dhe Leonidha Guces

Gjykata ka marrë një vendim të rëndësishëm lidhur me procesin gjyqësor ndaj Denis Meçes dhe Leonidha Guces, të cilët akuzohen për ngjarjen e rëndë të regjistruar dy vite më parë në qytetin e Pogradecit, ku mbeti i vrarë Egli Proga. Në seancën e fundit të zhvilluar, trupi gjykues ka refuzuar zyrtarisht kërkesën e dy të pandehurve për të kaluar në procedurën e gjykimit të shkurtuar. Kujtojmë se gjatë seancës pararendëse, mbrojtja e dy të akuzuarve kishte paraqitur kërkesën për përfitimet që sjell ky institucion procedural, por ky pretendim është rrëzuar këtë të hënë nga ana e gjykatës. Me rrëzimin e kësaj kërkese, çështja penale do të vijojë rrugën e saj normale përmes procedurës së zakonshme. Kjo do të thotë se procesi do të përfshijë një shqyrtim të detajuar dhe të gjithanshëm të provave, si dhe analizimin e të gjitha rrethanave dhe fakteve që rrethojnë ngjarjen tragjike.