Paketë e re ligjore: Qeveria i hap rrugë Byrosë së Pasurisë dhe reformave rrënjësore në drejtësi e energji

Ekzekutivi ka zhvilluar mbrëmë mbledhjen e radhës në formë elektronike, ku ka marrë vendim për miratimin e një pakete të gjerë projektligjesh që synojnë transformimin e sektorit të drejtësisë, energjetikës dhe fusha të tjera kyçe për vendin. Në qendër të vëmendjes së kësaj mbledhjeje ishin nismat ligjore për reformimin e sistemit gjyqësor dhe prokurorial. Kabineti qeveritar i dha dritën jeshile Projektligjit për Byronë Shtetërore për Verifikimin e Konfiskimin e Pasurisë së Pajustifikueshme, dokument ky që përcakton fushëveprimin, kompetencat institucionale dhe procedurat për identifikimin dhe sekuestrimin e aseteve me burim të pajustifikuar. Po ashtu, u votuan nismat ligjore që rregullojnë procesin e rekrutimit, vlerësimit të performancës, verifikimit të integritetit dhe statusit profesional të gjyqtarëve dhe prokurorëve, si dhe u miratua Projektligji për Përgjegjësinë Disiplinore të Gjyqtarëve dhe Prokurorëve. Pjesë e kësaj paketë reformuese ishin edhe projektligjet për amandamentimin e ligjeve ekzistuese që rregullojnë funksionimin e Këshillit Gjyqësor dhe Këshillit Prokurorial të Kosovës, krahas miratimit të Projektligjit për Akademinë e Drejtësisë. Në fushën e ekonomisë dhe infrastrukturës energjetike, qeveria miratoi Projektligjin për Energjinë dhe atë për Energjinë Elektrike. Këto akte synojnë stabilizimin dhe rregullimin e tregut, sigurimin e një furnizimi të pandërprerë me energji, si dhe krijimin e një mjedisi të hapur dhe konkurrues. Gjatë kësaj mbledhjeje u votuan edhe Projektligji për Inovacion dhe Ndërmarrësi, Projektligji për Pagesat e Vonuara në Transaksionet Tregtare, si dhe projektligji që i hap rrugë ratifikimit të marrëveshjes së kredisë me Agjencinë Franceze për Zhvillim, e cila mbështet financiarisht Projektin e Lojërave Mesdhetare XXI në Kosovë. Ndër vendimet e tjera me rëndësi ishte edhe procedimi për në Kuvend i propozimeve për kandidatët për Kryesues dhe dy anëtarë të Bordit të Zyrës së Rregullatorit për Energji (ZRRE). Në fund, ekzekutivi miratoi Deklaratën e Prioriteteve Afatmesme për periudhën 2027–2029 dhe mori disa vendime administrative që kanë të bëjnë me dhënien në shfrytëzim të pronave publike për shfrytëzimin dhe përpunimin e gurit gëlqeror dhe materialeve minerale të ngjashme.