Reagimi i Altin Krasniqit pas vendimit të Hagës: Nuk u dënuan personat, por vetë Ushtria Çlirimtare e Kosovës

Altin Krasniqi, biri i ish-kryeparlamentarit dhe njërit prej figurave kryesore të Ushtrisë Çlirimtare të Kosovës, Jakup Krasniqit, ka bërë një tjetër reagim publik lidhur me vendimin e fundit të Dhomave të Specializuara në Hagë ndaj katër ish-krerëve të kësaj ushtrie. Nëpërmjet një postimi në rrjetet sociale, ai ka theksuar se po të ishin vlerësuar vetëm aktet e tyre personale dhe jo rolet që kanë mbajtur në strukturat drejtuese të UÇK-së, ata do të kishin qenë të liri sot. Sipas tij, pikërisht këto personalitete kanë dhënë një kontribut të çmuar edhe në procesin e shtetndërtimit të Kosovës në periudhën e pasluftës. Në vijim të mesazhit të tij, ai ka shprehur hapur shqetësimin se ky vendim godet më shumë se thjesht individët: "Nëse ua heqim pozitat që kanë mbajtur në Shtabin e Përgjithshëm të UÇK-së dhe i gjykojmë vetëm individualisht, mbi veprimet konkrete të secilit, ata sot do të ishin të lirë! Por, pikërisht për shkak të pozitave të tyre në UÇK, ata u bënë ndër figurat kryesore që negociuan dhe nënshkruan Marrëveshjen e Rambujesë dhe më pas kontribuuan në krijimin e shtetit të Kosovës! Prandaj, ajo që dhemb më shumë është se, përmes tyre, është dënuar UÇK-ja dhe sakrifica e një populli të tërë!"