Iniciativa e PDK-së për Gjykatën Speciale nën lupë, Gërvalla: S’ka vendime të nxituara

Ministrja e Drejtësisë, Donika Gërvalla, ka bërë të ditur se çdo iniciativë që prek Dhomat e Specializuara në Hagë kërkon analizë të thellë profesionale dhe maturi të lartë institucionale, duke refuzuar çdo qasje të ngutshme në këtë proces të ndjeshëm. “Shumica e gjërave që lidhen me Dhomat e Specializuara janë çështje të ekspertizës dhe nevojitet kujdes i madh që të mos bëjmë gabime”, ka deklaruar Gërvalla. Ajo ka konfirmuar se njësitet e specializuara brenda dikasterit që ajo drejton janë duke shqyrtuar me vëmendje projektligjin e dorëzuar nga Partia Demokratike e Kosovës (PDK). “Në Ministrinë e Drejtësisë janë ekspertët që po e analizojnë edhe projektligjin e PDK-së. Kur ta kemi gati, do ta dërgojmë opinionin në Qeveri, por nuk duam të nxitojmë vendimin dhe ta paguajmë me cilësi të munguar e me gabime të papranueshme”, ka thënë ministrja.