Gërvalla thyen heshtjen për Hagën: Jemi fokusuar te beteja ligjore, akuzat ndaj meje janë të pavërteta

Ministrja e Drejtësisë, Donika Gërvalla, ka hedhur poshtë pretendimet se ka qëndruar e heshtur lidhur me vendimin e fundit të Gjykatës Speciale në Hagë, duke theksuar se angazhimi i saj dhe i ekipit qeveritar është përqendruar tërësisht te përgatitjet për fazat vijuese të këtij procesi gjyqësor. Gjatë një prononcimi ku iu përgjigj pyetjeve rreth mungesës së një reagimi të saj publik dhe thirrjeve të protestuesve për dorëheqjen e saj, ajo hodhi poshtë çdo aludim për lidhje apo bashkëpunim të kaluar me UNMIK-un, EULEX-in apo Gjykatën Speciale, duke i quajtur këto pretendime si të përsëritura dhe të pabazuara. “Po filloj nga e fundit. Tek deklaratat që më lidhin mua në çfarëdo lloj forme me bashkëpunimin, tashmë është bërë bajate sepse i kam shpjeguar disa herë. Nuk kam në asnjë hallkë, as me UNMIK-un, as me EULEX-in, as me Gjykatën Speciale, nuk kam asnjë pikë takimi, as direkt e as indirekt. Mirëpo, edhe pak durim duhet të kemi sepse aktgjykimi do të vijë shpejt dhe do ta shohim shumë shpejt. Edhe një shpresë të vogël e kam që në fakt ata që më së shumti kanë bërtitur në këtë lëmi, ata që më së shumti më kanë etiketuar me lloj-lloj emrash, të paktën para pasqyrës të skuqen për një moment që nuk kanë dashur t’i dëgjojnë faktet, betejën ligjore, nuk është betejë deklaratash në media. Dhe si betejë ligjore, ne duhet të jemi profesionistë, të mençur, me kokën të ftohtë, pa shumë bërtima, duhet të përgatitemi për instancën e ardhshme”, deklaroi ajo. Sipas ministres, qasja institucionale nuk kërkon deklarata emocionale, por punë të dedikuar profesionale, ndërsa shtoi se Qeveria e Kosovës tashmë e ka bërë të qartë pozicionin e saj zyrtar përmes kryeministrit. “Ndërsa sa i përket heshtjes, unë nuk kam heshtur. Jam ministre e Drejtësisë. Kryeministri ka dhënë një deklaratë në emër të Qeverisë së Republikës së Kosovës, ndërsa unë së bashku me ekipin tim, që nga dita e parë, jam futur punës me qëllim që të përgatitemi për një betejë, sepse çështja e Gjykatës Speciale është betejë ligjore, nuk është betejë deklaratash në media. Dhe si betejë ligjore, ne duhet të jemi profesionistë, të mençur, me kokën të ftohtë, pa shumë bërtima, duhet të përgatitemi për instancën e ardhshme”, u shpreh ajo. Gërvalla bëri të ditur se ekzekutivi po i shqyrton me kujdes të gjitha rrethanat për të përcaktuar hapat e mëtutjeshëm institucionalë, duke përmendur edhe vlerësimet e mbrojtjes së të dënuarve. “Ju e keni dëgjuar edhe njërin prej avokatëve të katër të akuzuarve edhe tashmë të dënuarve në instancë të parë, i cili thotë që Qeveria nuk di çfarë do të ishte dashur të bëjë më shumë. Unë jam e bindur që mund të bëjmë më shumë. Mirëpo jemi duke i shikuar dhe analizuar të gjitha rrethanat me qëllim që secili në pozitën e tij, në përgjegjësinë e tij, ta kryejë punën e tij me ndershmëri dhe ashtu siç duhet”, u shpreh ministrja. Lidhur me kërkesat e protestuesve për largimin e saj nga detyra, ajo theksoi se një gjë e tillë është pjesë e pashmangshme e dinamikës së një shoqërie të lirë dhe demokratike. “Është e drejtë e secilit qytetar të Republikës së Kosovës të kërkojë dorëheqjen e secilit ministër. Jetojmë në një shtet demokratik ku është e drejtë e secilit ta shprehë mendimin e tij. Prandaj nuk e komentoj unë kërkesën për dorëheqje, nuk është e imja as t’i imponoj dikujt dorëheqjen, por as t’ia ndaloj fjalën kërkujt. Është e rëndësishme që në institucionin për të cilin unë mbaj përgjegjësi, të kryhen punët ashtu si duhet edhe këto tema të diskutimeve publike të menaxhohen”, përfundoi Gërvalla.