Analisti nga Presheva zbërthen prapaskenat: Pse Serbia ndaloi delegacionin e Vetëvendosjes në kufi?

Një ngjarje e rëndë ka ndodhur në pikën kufitare të Depcës, ku policia serbe ka penguar lëvizjen e një delegacioni të Lëvizjes Vetëvendosje, të përbërë nga shefja e Grupit Parlamentar, Arbërie Nagavci, deputetet Fatmire Kollçaku e Liza Gashi, si dhe këshilltari politik Ragmi Mustafi. Grupi po udhëtonte drejt Preshevës me qëllim që t'i shprehte ngushëllime kryetares së kësaj komune, Ardita Sinani, për ndarjen nga jeta të babait të saj. Sipas dëshmive të vetë zyrtarëve të ndaluar, autoritetet kufitare i lanë ata të prisnin për më shumë se dy orë pa u dhënë asnjë lloj sqarimi zyrtar, para se t'i komunikonin përfundimisht se nuk do t'i lejonin të vazhdonin rrugën. Për shkak të këtij bllokimi arbitrar, akti i ngushëllimit u detyrua të kryhej në zonën kufitare, ku vetë Ardita Sinani së bashku me familjarët e saj dolën për t'i takuar. Këtë akt e ka dënuar ashpër analisti nga Presheva, Nehat Hyseni, i cili e ka cilësuar atë si të papranueshëm dhe thellësisht politik. Ai ka theksuar se një ngjarje e tillë dëshmon mungesën e respektit minimal njerëzor në raste mortore dhe kërkon që dhimbja familjare të mbahet larg çdo kalkulimi apo rivaliteti shtetëror. Duke e quajtur veprimin e policisë serbe si të shëmtuar dhe pa asnjë bazë ligjore, Hyseni ka tërhequr vëmendjen se kontrolli kufitar po përdoret sërish si mjet presioni politik, në vend që të funksionojë për siguri dhe qarkullim normal. “Nuk bëhet fjalë për t'i mohuar Serbisë të drejtën e kontrollit të kufijve të saj, pasi çdo shtet ka detyrim zbatimin e ligjit. Megjithatë, kontrolli kufitar nuk përbën autorizim për sjellje arbitrare”, është shprehur ndër të tjera Hyseni, duke shtuar se kufizimet e lirisë së lëvizjes duhet të jenë gjithmonë të argumentuara ligjërisht dhe të hapura për ankesa procedurale.