Hajduku i Splitit mposht Dinamon e Zagrebit në derbin kroat, paraqitje solide e Raçit

Hajduku i Splitit ka triumfuar në derbin e madh të futbollit kroat kundër rivalit të tyre të përbetuar, Dinamos së Zagrebit, duke regjistruar një fitore të rëndësishme me rezultatin 2:1. Sfida nisi më mirë për mysafirët, të cilët kaluan në epërsi në minutën e 21-të. Pas një krosimi fantastik të Vinlof, Beljo u la i pambuluar brenda zonës dhe me një goditje të saktë me kokë kaloi “Të kaltrit” në avantazh në stadiumin “Polud”. Megjithatë, përgjigja e vendasve nuk vonoi. Vetëm tri minuta më vonë, saktësisht në minutën e 24-t, McKenna shënoi në portën e gabuar, duke realizuar një autogol që barazoi shifrat në 1:1. Pjesa e dhomave të zhveshjes solli kthesën e plotë në minutën e 59-të, falë një goli spektakolar të shënuar nga Bamba. Pas një harkimi dhe një largimi të gabuar të mbrojtjes, topi i erdhi në këmbë sulmuesit, i cili lëshoi një predhë drejt portës, duke e lënë portierin Kotarski plotësisht të pafuqishëm. Në këtë takim, futbollisti i kombëtares, Rron Raçi, u aktivizua nga minuta e parë si titullar për skuadrën e Hajdukut. Gjatë lojës, ai u ndëshkua me karton të verdhë në minutën e 62-të, ndërsa u largua nga fusha përmes një zëvendësimi në çastet e fundit të ndeshjes. Pas përfundimit të javës së nëntë, Hajduku i Splitit forcon kreun e renditjes me 19 pikë të tubuara, duke krijuar një distancë prej tri pikësh dhe një ndeshje më shumë nga Dinamo e Zagrebit, e cila pozicionohet e dyta.