I shpallur në kërkim nga Interpoli për rastin e Banjskës, Milan Radoiçiq shfaqet në krah të djalit të Vuçiqit në Kragujevc

Milan Radoiçiq, person i shpallur në kërkim ndërkombëtar nga Interpoli, është fotografuar së bashku me Danilo Vuçiqin, djalin e ish-presidentit të Serbisë, në një tubim parazgjedhor të Partisë Përparimtare Serbe (SNS) në qytetin e Kragujevcit. Sipas pamjeve të publikuara, Radoiçiq është parë në afërsi të Danilo Vuçiqit para sallës “Jezero”, ku po mbahej tubimi i partisë në pushtet në Serbi. Danilo Vuçiq kishte mbërritur në vendngjarje i shoqëruar nga disa automjete zyrtare me drita sinjalizuese, për t'u bashkuar më pas me ish-nënkryetarin e Listës Srpska. Kujtojmë se Milan Radoiçiq, i cili ka pranuar publikisht se ka udhëhequr grupin e armatosur në sulmin terrorist të 24 shtatorit 2023 në Banjskë të Zveçanit, ku mbeti i vrarë rreshteri i policisë Afrim Bunjaku, është shënjuar me fletëarrest ndërkombëtar. Interpoli lëshoi urdhër-arrestin për Radoiçiqin dhe 11 persona të tjerë në dhjetor të vitit 2023. Në rrafshin ndërkombëtar, Bashkimi Evropian dhe NATO kanë kërkuar vazhdimisht nga autoritetet serbe që të sigurojnë drejtësi dhe të mbajnë përgjegjës Radoiçiqin dhe bashkëpunëtorët e tij për ngjarjet e dhunshme në veri të Kosovës. Ndërkohë, Radoiçiq dhe biznesmeni tjetër serb, Zvonko Veselinoviq, prej rreth pesë vitesh ndodhen në listën e sanksioneve të Shteteve të Bashkuara të Amerikës, për shkak të përfshirjes së dyshuar në krim të organizuar dhe korrupsion. Përveç çështjes së Banjskës, prania e Radoiçiqit është shoqëruar me tensione edhe brenda territorit të Serbisë. Gjatë zgjedhjeve lokale në Kosjeriq, dëshmitarë dhe grupi qytetar “Njerëz të ndershëm për një Kosjeriq të pastër” raportuan se ai kishte vizituar qytetin në krye të një grupi personash me automjete fuoristradë. Sipas dëshmive të banorëve vendas, gjatë kësaj vizite ata kishin hyrë në kafene dhe ishin takuar me zyrtarë lokalë, duke krijuar një atmosferë frikësimi dhe kërcënimi për qytetarët.