Valë dhune në Poloni: Tre të plagosur nga një sulm me thikë në një shkollë në Varshavë

Një tjetër ngjarje e rëndë ka tronditur vendin, pasi tre persona kanë mbetur të plagosur si pasojë e një sulmi me thikë të ndodhur të shtunën brenda mjediseve të një institucioni arsimor në kryeqytetin polak, Varshavë. Ky incident shënon rastin e tretë brenda pak ditësh, duke rritur ndjeshëm shqetësimet e autoriteteve mbi një fenomen të mundshëm të dhunës imitative mes të rinjve. Ngjarja vjen menjëherë pas një angazhimi masiv të forcave të rendit, ku mijëra efektivë policie vizituan shkolla në mbarë vendin për të qetësuar nxënësit. Kjo masë u mor pasi dy sulme të ngjashme me thikë, të kryera nga adoleshentë brenda vetëm dy ditëve, kishin shkaktuar frikë dhe panik nga thashethemet për akte të tjera të dhunshme, ndërsa sulmi i së shtunës pritet të rrisë edhe më shumë tensionin në shoqëri. Zëdhënësi i policisë, Jakub Filipiak, ka deklaruar se autoritetet janë njoftuar rreth orës 12:30 për një ngjarje ku është përdorur një armë e rrezikshme. Ai sqaroi se një person ka pësuar lëndime dhe është dërguar në spital, por fatmirësisht pa rrezik për jetën, ndërsa dy kalimtarë të tjerë kanë marrë lëndime të lehta dhe nuk kanë pasur nevojë për shtrim spitalor. Sipas informacioneve paraprake të bëra publike nga agjencia shtetërore PAP, të lënduarit janë dy vajza 17-vjeçare dhe një grua 24-vjeçare, e cila kishte shkuar në shkollë për të dorëzuar dokumentet e regjistrimit. Të njëjtat burime bëjnë me dije se autori dhe viktimat nuk kishin asnjë njohje paraprake mes tyre. Në kuadër të masave të sigurisë, policia njoftoi se deri të shtunën janë inspektuar afërsisht 50,000 objekte shkollore dhe janë ndaluar gjithsej 76 persona. Autoritetet konfirmuan se pjesa më e madhe e të ndaluarve janë adoleshentë të cilët kishin lëshuar kërcënime përmes internetit. Kjo valë incidentesh nisi të mërkurën, kur një 19-vjeçar plagosi 10 persona (përfshirë edhe veten) në një shkollë në Ostroleka, në veri të kryeqytetit. Pas kësaj, të enjten, një ish-nxënës 15-vjeçar, i pajisur me një kamerë të montuar në helmetë, vrau një kujdestar dhe plagosi dy mësues në një shkollë fillore në Leszczydol-Nowiny, në verilindje të Varshavës.