Gjiganti anglez vë syfete te ylli 100 milionë euro, portugezët marrin masa

Klubi i Liverpoolit thuhet se ka shfaqur interesim serioz për të siguruar shërbimet e një anësori me perspektivë të lartë, i cili shihet si pasardhësi ideal i Luis Diazit në skuadër. Gjatë afateve kalimtare të kaluara, “Të Kuqtë” nuk janë kursyer aspak në investime për të pasur një repart sulmues sa më cilësor, ku tashmë bëjnë pjesë emra të njohur si Alexander Isak, Hugo Ekitike dhe blerja më e freskët, Bradley Barcola. Në këtë linjë, drejtuesit e klubit anglez po planifikojnë lëvizje strategjike për të ardhmen, ndërsa në krye të dëshirave të tyre thuhet se qëndron anësori brazilian, William Gomes. Talenti i Portos kishte rënë në radarin e anglezëve qysh në përfundim të merkatos verore, kohë kur qarkullonin zëra për një tentativë të mundshme në sekondat e fundit të afatit kalimtar. 20-vjeçari ka qenë në shënjestër të disa prej skuadrave më të mëdha evropiane gjatë vitit të fundit, përfshirë Newcastle United, Arsenal, Manchester United dhe Chelsea, megjithatë deri më tani nuk është regjistruar asnjë marrëveshje konkrete. Pavarësisht se në Anfield rrugët u kryqëzuan me Bradley Barcolan nga Paris Saint-Germaini për një shifër prej 123 milionë funtesh, raportimet e mediave portugeze nga gazeta “A Bola” sugjerojnë se interesimi i Liverpoolit për Gomesin mbetet tejet i lartë. Megjithatë, ambiciet e skuadrave të interesuara janë vështirësuar së fundmi, pasi Porto ka vendosur t’ia rinovojë kontratën lojtarit edhe për dy sezone të tjera, duke e blinduar atë në stadiumin “Dragão” deri në qershor të vitit 2031. Me këtë marrëveshje të re, klauzola e largimit të brazilianit është rritur ndjeshëm, duke kaluar nga 80 milionë euro (69.6 milionë funte) në plot 100 milionë euro (87 milionë funte). Edhe pse klauzola është vendosur në shifra të larta, vlerësimi aktual i tregut për Gomesin sillet rreth 30 milionë euro (26.1 milionë funte), çka lë të kuptohet se klubet e interesuara mund të mos kenë nevojë të paguajnë shumën maksimale për ta transferuar. Kjo klauzolë e re pasqyron bindjen e drejtuesve portugezë se vlera e kartonit të tij do të njohë rritje të shpejtë, sidomos duke parë paraqitjet dhe statistikat e shkëlqyera që ai po regjistron në fushën e blertë. Në nëntë paraqitje gjatë këtij edicioni, anësori ka realizuar dy gola dhe ka dhuruar dy asistime. Ndërkaq, gjatë sezonit të kaluar ai kontribuoi me tetë gola dhe një asist, duke dhënë një kontribut vendimtar në rrugëtimin e Portos drejt titullit kampion. Pas zyrtarizimit të kontratës afatgjatë të lojtarit, presidenti i klubit, Andre Villas-Boas, pranoi se talenti i ri kishte tërhequr vëmendjen e disa klubeve të mëdha, gjë që i detyroi drejtuesit t’i ofrojnë kushte më të favorshme. “Jemi jashtëzakonisht të lumtur me rritjen e Williamit dhe donim ta vlerësonim siç duhet. Ai ka zgjuar interesimin e shumë skuadrave dhe ne nuk mund ta anashkalonim këtë fakt, ndonëse përkushtimi i tij ndaj Portos ka qenë total”, u shpreh kreu i klubit. “Statistikat e tij thonë gjithçka për punën dhe angazhimin e tij të jashtëzakonshëm, si në fazën sulmuese ashtu edhe në atë mbrojtëse. Këto janë parimet tona, të japësh gjithçka për fanellën”, shtoi ai. “Vendimi për zgjatjen e kontratës u mor në bashkëpunim të ngushtë me trajnerin, i cili vlerësoi se ky ishte çasti i duhur për ta shpërblyer lojtarin për seriozitetin dhe përkushtimin e treguar”, theksoi tutje Villas-Boas. Duke lënë të kuptohet se ky ishte një mesazh i qartë për Liverpoolin dhe palët e tjera të interesuara, ai përfundoi: “Arritëm marrëveshje brenda një kohe të shkurtër, pasi kjo ishte edhe dëshira e vetë Williamit. Shpresojmë që kjo të jetë vetëm nisja e një rrugëtimi të jashtëzakonshëm sportiv”.