Kurti takon myftiun Tërnava: Në fokus edhe zhvillimet politike dhe çështja e ish-krerëve të UÇK-së

Kryeministri i Kosovës, Albin Kurti, ka zhvilluar një takim zyrtar në kabinetin e tij me kryetarin e Bashkësisë Islame të Kosovës, myftiun Naim Tërnava. Përmes një publikimi në rrjete sociale, kreu i ekzekutivit bëri të ditur se në qendër të bisedës ishin partneriteti ndërinstitucional, realizimi i nismave të përbashkëta, situata gjeopolitike në rajon, si dhe vendimi i shkallës së parë të Dhomave të Specializuara në Hagë ndaj ish-krerëve të Ushtrisë Çlirimtare të Kosovës. Duke shprehur falënderimin e tij, Kurti u shpreh se është gjithmonë kënaqësi të presë në takim myftiun Tërnava, i cili një ditë më parë e uroi për zgjedhjen e presidentes së re, Justina Shiroka Pula, një hap ky që sipas tij shmangi ciklin e zgjedhjeve të katërta parlamentare brenda një periudhe dyvjeçare dhe riktheu stabilitetin institucional të vendit. Në këtë bashkëbisedim u trajtuan gjithashtu ecuria e bashkëpunimit, nismat e përbashkëta, solidariteti dhe humanizmi qytetar, ruajtja e vlerave shoqërore e kombëtare, si dhe dinamikat politike vendore e rajonale. Një vëmendje e veçantë iu kushtua edhe aktgjykimit të shkallës së parë në Hagë ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, duke e cilësuar atë si të padrejtë e të pasaktë, ndërsa u diskutua edhe për angazhimet e ardhshme drejt një suksesi në procesin e apelit. Në përmbyllje të takimit, kryeministri Kurti ritheksoi mirënjohjen e thellë për angazhimin konstruktiv dhe kontributin e çmuar që Bashkësia Islame e Kosovës ka dhënë dhe vazhdon të jep për shoqërinë tonë.