Pakënaqësi nga Sindikatat: Qeveria s’mund të përcaktojë shpenzimet minimale të familjeve pa konsensus

Publikimi i shportës qeveritare të shpenzimeve mujore ka sjellë një reagim të ashpër nga Lidhja e Sindikatave të Maqedonisë së Veriut (LSM). Sindikatat theksojnë se punëtorët dhe qytetarët janë ata që e dinë më së miri se çfarë u duhet për të mbyllur muajin me dinjitet dhe për të mbuluar nevojat bazë të familjeve të tyre, duke shtuar se askush tjetër nuk ka të drejtë të bëjë llogari në emër të tyre se si duhet të jetojnë. Sllobodan Trendafilov, kryetar i LSM-së, ka theksuar se një vendim i tillë nuk mund të merret pa marrë më parë pëlqimin e Këshillit Ekonomik dhe Social. “Nëse një familje mund t'ia dalë mbanë mesatarisht me këtë shportë qeveritare, kjo është një pyetje për çdo vatër, por nga ana tjetër, një llogaritje e tillë dëshmon qartë se pagat duhet të ngrihen me të paktën 6,000 denarë. Me dy paga minimale aktualisht mungojnë 6,383 denarë për të arritur këtë nivel, çka konfirmon plotësisht thirrjet tona për rritjen e pagës minimale dhe të të ardhurave në përgjithësi”, ka deklaruar Trendafilov. Kreu i sindikatave ka kujtuar se që prej vitit 2011, LSM-ja ka përllogaritur çdo muaj vlerën e Shportës Minimale Sindikale. Sipas tij, dikur dhe sot, kjo shportë nuk shërben për të treguar se sa mjete mjaftojnë për të mbijetuar, por për të dëshmuar se me aq para nuk mund të jetohet normalisht. Në fund, Trendafilov ka bërë me dije se në shtator të vitit 2025, shporta minimale e sindikatave ka kapur shifrën e 65,077 denarëve, duke reflektuar një shtesë prej 4,355 denarësh në buxhetin e kërkuar mujor brenda vetëm një viti.