Iván Ramiro Córdoba thur elmeta për Cristian Chivu: Trajneri që po i jep Interit qetësinë dhe suksesin

Ish-mbrojtësi i njohur i Interit dhe i përfaqësueses së Kolumbisë, Iván Ramiro Córdoba, ka thurur elmeta për ish-bashkëlojtarin e tij dhe trajnerin aktual zikaltër, Cristian Chivu, duke e cilësuar atë si një prej figurave më të rëndësishme për ekuilibrin e skuadrës. “A e dini se cila është pika më e fortë e Chivut? Është thjeshtësia. Ai mund të konsiderohet një profesor i vërtetë i thjeshtësisë,” – është shprehur Córdoba gjatë një interviste për të përditshmen italiane “Corriere della Sera”, duke sjellë ndërmend kohët kur ata ndanin sukseset në fushën e blertë. Sipas ish-futbollistit kolumbian, qasja e Chivut si trajner është një vazhdimësi e natyrshme e asaj që ai tregonte dikur si lojtar. “Tani që e shoh në pankinë, më duket sikur po përjetoj të njëjtën dinamikë. Kur luante në krahun e majtë apo në qendër të mbrojtjes, ai bënte çdo gjë me një natyrshmëri të jashtëzakonshme. Prania e tij në fushë të jepte gjithmonë një ndjenjë sigurie dhe qetësie.” Kjo qetësi, sipas Cordóbës, është pikërisht ajo që teknikun aktual ka arritur t’ua transmetojë futbollistëve të Interit. Falë tij, skuadra ka gjetur sërish ekuilibrin mendor dhe po e interpreton lojën e futbollit në mënyrën më të pastër të mundshme, e cila duket qartë edhe te mënyra se si vetë Chivu komunikon, duke qenë gjithmonë i drejtpërdrejtë, i qartë dhe në thelb të gjërave. Duke analizuar ambiciet e klubit në arenën ndërkombëtare dhe sidomos në Ligën e Kampionëve, ish-mbrojtësi theksoi se zikaltrit i kanë të gjitha kapacitetet e duhura. “Interi ka si organikën e lojtarëve ashtu edhe pjekurinë e nevojshme për të prekur sërish finalen, për herë të tretë. Nuk bëhet fjalë vetëm për një tentativë, por për një objektiv që ata duhet ta arrijnë me çdo kusht.” “Ky është mentaliteti që duhet të karakterizojë një klub të madh. Cristian e njeh shumë mirë këtë atmosferë që prej periudhës së lavdishme të tripletës, ndaj sfida e tij më e madhe është pikërisht përcjellja e këtij mentaliteti fitues te lojtarët dhe i gjithë ambienti rrethues,” – përfundoi Córdoba.