Gjest madhështor, mbrojtësi i Kombëtares Mario Mitaj ndihmon familjen Prelocaj në Vermosh

Përtej paraqitjeve fantastike në fushën e blertë, futbollisti i Kombëtares shqiptare, Mario Mitaj, vazhdon të dëshmojë vlerat e larta njerëzore dhe shpirtin human, duke u shquar për ndihmën e dhënë jashtë kufijve të fushës së lojës. Së fundmi, lojtari 23-vjeçar ka treguar solidaritet të lartë duke dhuruar një fond prej 5000 dollarësh në mbështetje të familjes Prelocaj, e cila jeton në zonën e Vermoshit në Shkodër. Kjo familje po kalon një periudhë tejet të vështirë, të rënduar nga kushtet e rënda ekonomike dhe sfidat e vazhdueshme me shëndetin. Situata e tyre u rëndua edhe më shumë pak kohë më parë, kur familja humbi djalin e vetëm pas një beteje të gjatë me një sëmundje të rëndë. Sapo është vënë në dijeni për këtë dramë njerëzore, Mitaj ka ndërhyrë menjëherë duke kontribuar me shumën prej 5000 dollarësh përmes platformës së financimit të hapur “GoFundMe”, me synimin për t'i ardhur në ndihmë nënës së pikëlluar dhe tre motrave të djalit të ndjerë.