Vesel Makolli: Kosova duhet t’i jep fund përplasjeve politike dhe të fokusohet te SHBA-ja dhe BE-ja

Pas një periudhe të gjatë të ngërçit institucional dhe tensioneve politike, Kosova ka nevojë urgjente që energjitë e saj t’i orientojë kah konsolidimi i shtetit, zhvillimi i brendshëm dhe thellimi i aleancave me partnerët tanë strategjikë. Kështu vlerëson Vesel Makolli, i cili në prononcimin e tij adreson edhe tendencat e shoqërisë për t’u përfshirë në kauza të nxitura nga emocionet dhe glorifikimi folklorik, shpesh pa bërë një analizë paraprake të efekteve të tyre të mirëfillta juridike dhe politike. Duke analizuar protestat dhe përpjekjet legjislative për ndryshimin dhe plotësimin e Ligjit për Dhomat e Specializuara, Makolli thekson se çdo pritshmëri për të modifikuar juridiksionin apo mënyrën e funksionimit të kësaj gjykate përmes kësaj rruge ka qenë plotësisht e pabazuar. Megjithatë, ai pranon se këto protesta mund të kenë luajtur një rol të tërthortë në skenën politike, duke ndihmuar në përgatitjen e kushteve për kapërcimin e bllokadës institucionale. Në të njëjtën linjë, ai e vlerëson qasjen e Qeverisë së Kosovës ndaj kësaj nisme, duke argumentuar se mungesa e mbështetjes konkrete për këtë ligj ka shërbyer për të shmangur fërkimet e panevojshme me Bashkimin Evropian dhe aleatët e tjerë ndërkombëtarë të vendit. Duke iu kthyer mentalitetit shoqëror dhe politik ndaj kauzave të ndryshme, Makolli shpreh hapur kritika për mungesën e një analize më të thellë rreth pasojave shtetërore e juridike që mund të sjellin veprime të tilla. “Jemi një popull euforik, i zhytur thellë në indoktrinimin folkloriko-glorifikues. Prandaj, biem lehtë pre e kauzave të ndryshme, të cilat mund të jenë gjithçka, por jo domosdoshmërisht të dobishme për kombin dhe shtetin”, shprehet Makolli. Sipas tij, përfaqësuesit politikë dhe mbarë shoqëria, para se të ndërmarrin hapa të tillë, janë të detyruar të studiojnë me kujdes bazën juridike dhe mundësitë reale që këto nisma të prodhojnë rezultatet e dëshiruara. Në këtë drejtim, Makolli përsërit se nisma për ndryshimin dhe plotësimin e Ligjit për Dhomat e Specializuara ishte e destinuar të mos sillte asnjë ndryshim në kompetencat apo mandatin e gjykatës, pasi themeli i saj rregullohet përmes Kushtetutës dhe legjislacionit përkatës. “Për secilin prej nesh, e në veçanti për ata që merren me politikë, është dashur të jetë e qartë se ligji për ndryshimin dhe plotësimin e Ligjit për Dhomat e Specializuara nuk do të prodhojë asnjë efekt juridik, gjegjësisht nuk do të mund të ndryshojë juridiksionin, mandatin apo funksionimin e Dhomave të Specializuara të Kosovës, të cilat e kanë bazën juridike në Kushtetutë dhe në legjislacionin përkatës”, deklaron ai. Megjithatë, ai përsërit se efektet e protestave duhet të shihen në prizmin e dinamikave të brendshme, pasi ato ndihmuan sadopak në zhbllokimin e ngërçit. “E mira e këtyre protestave është se, sado pak, ndikuan në konsolidimin e institucioneve shtetërore, përkatësisht në krijimin e kushteve politike për zgjedhjen e Presidentes”, thekson Makolli. Në fund, ai nënvizon se ky ndikim nuk duhet parë i shkëputur nga konteksti i plotë i rrethanave politike që mundësuan zgjidhjen e krizës, ndërsa kërkon një qasje të re qeverisëse të bazuar te përgjegjësia institucionale dhe bashkëpunimi i ngushtë me Shtetet e Bashkuara të Amerikës dhe Bashkimin Evropian.