I lirë në Serbi dhe në kërkim nga Interpoli, Milan Radoiçiq shfaqet krah djalit të Vuçiqit në një tubim zgjedhor

Milan Radoiçiq, i njohur si organizator i sulmit terrorist dhe i kërkuar përmes urdhër-arrestit ndërkombëtar nga Interpoli, vazhdon të lëvizë i pashqetësuar në territorin e Serbisë. Ai është fotografuar dhe filmuar së fundmi duke marrë pjesë hapur në një ngjarje parazgjedhore të organizuar nga Partja Përparimtare Serbe. Pamjet filmike të transmetuara së pari nga burimet mediatike serbe dëshmojnë praninë e Radoiçiqit në qytetin e Kragujevcit. Aty ai është parë në mesin e turmës, madje duke qëndruar në afërsi të drejtpërdrejtë me Danilo Vuçiqin, djalin e kreut të shtetit serb, Aleksandër Vuçiq. Kujtojmë se Milan Radoiçiq mban përgjegjësinë e plotë për sulmin e armatosur të ndodhur në Banjskë të Zveçanit, ku mbeti i vrarë rreshteri i Policisë së Kosovës, Afrim Bunjaku, ndërkohë që autoritetet e drejtësisë vendase dhe ndërkombëtare vijojnë të kërkojnë llogaridhënien e tij.